QR AShM alǵashqy jarnasyz sút qabyldaý pýnktin ashýdyń joldaryn tanystyrdy

ASTANA. QazAqparat - QR Aýyl sharýashylyǵy mınıstrliginde QR Aýyl sharýashylyǵy birinshi vıtse-mınıstri Q. Aıtýǵanovtyń tóraǵalyǵymen Qaraǵandy oblysynyń Nura aýdanyndaǵy sút baǵyty boıynsha kooperatıvterdiń pılottyq úlgileriniń tanystyrylymy bolyp ótti.

Mınıstrliktiń baspasóz qyzmetiniń habarlaýynsha, tanystyrylym barysynda Q.Aıtýǵanov «Jumyspen qamtý 2020 jol kartasy» baǵdarlamasynyń qarjylandyrý sharalarynyń aıasynda aýyl sharýashylyǵy kooperatıvterin uıymdastyrýǵa basymdyq beriletinin habarlady. Olardyń kesheninde sút qabyldaý jáne mal bordaqylaý alańdary qurylatyn bolady.

Buǵan deıin atalǵan baǵyttaǵy jumysty jandandyrý úshin úlgilik kooperatıvterdi qurýdyń pılottyq jobasyn iske qosý týraly sheshim qabyldanǵan edi. Mundaǵy basty maqsat - osy úderistiń barysynda jınaqtalǵan tájirıbeni elimizdiń ózge de aımaqtaryna taratý. Óz kezeginde, Nura aýdany da kezdeısoq tańdalmaǵan. Bul aýdannyń aýmaǵynda mal sharýashylyǵymen aınalysatyn 3 200 JQSh bar.

Sonymen birge, jıyn barysynda jańadan qurylyp jatqan kooperatıvterdi qarjylandyrý tetikteri sóz boldy. Atap aıtqanda, alǵashqy jarnasyz sút qabyldaý pýnktin iske qosý úshin qarjylandyrýdyń jańa mehanızmi tanystyryldy. Sondaı-aq, veterınarlyq qaýipsizdikti qamtamasyz etý máselesine basa nazar aýdaryldy. Mysaly, jyl sońyna deıin Respýblıkalyq veterınarlyq laboratorııanyń jergilikti jerlerdegi epızotıkalyq jaǵdaıyn baǵalaý úshin qan alý men sút ónimderin taldaý jumystary aıaqtalady.

Nura aýdany ákimi N.Omarhanov óz aýdanyndaǵy kooperatıvterdi uıymdastyrý úshin qolǵa alynyp jatqan sharalar tizbesin aıtty. Onyń aıtýynsha, sút qabyldaý pýnktteri jelisin qalyptastyrý úshin 12 aýyldyq okrýg tańdalǵan. Sút óndirisi áleýeti jylyna 4 200 tonnany quraıdy. Qazirgi tańda kooperatıvter qurýdyń negizderin túsindirý jáne áleýetti qaryz alýshylardy irikteý jumystary júrgizilýde.

Atalǵan jıynǵa qatysqan «Kazmoltorg», «Ren-Mılk» JShS-lary ókilderi jańadan qurylyp jatqan kooperatıvtermen birigip jumys jasaýǵa jáne olar óndirgen sútti satyp alýǵa ázir ekendikterin habarlady.

Otyrys sońynda aýdan aýmaǵynda sút baǵyty boıynsha 12 pılottyq kooperatıv qurý boıynsha birikken is-qımyldar josparyna qol qoıyldy. Sonymen qatar, kooperatıvterdi uıymdastyrý jumystarynyń keler jyldyń sáýirinde aıaqtalatyny habarlandy.