QR Ákimshilik protsestik kodeksiniń jobasy talqylandy

ASTANA. QazAqparat - Astana qalalyq mamandandyrylǵan aýdanaralyq ákimshilik sotynda qalalyq sot sýdıalary men aýdandyq jáne oǵan teńestirilgen sottar sýdıalarynyń qatysýymen Ákimshilik protsestik kodeks jobasyn talqylaýǵa arnalǵan semınar ótti.

Mamandandyrylǵan aýdanaralyq ákimshilik sotynyń tóraǵasy Qanat Dúısembıev ÁPK jobasy boıynsha óziniń eskertýleri men usynystaryn ortaǵa saldy.

Ákimshilik ádilet júıesin qurý ákimshilik quqyq buzýshylyq isterdiń jalpy qaǵıdattarynda sottardyń vedomstvoǵa tıistiligine jatqyzyla otyryp, jumys istep jatqan ákimshilik sottardyń negizinde josparlanýda.

Ákimshilik sottar taraptardyń tym bolmasa bireýi zańnamada kózdelgen tártipte bılik ókilettikteri, basqarý fýnktsııalary berilgen atqarýshy bılik organy, jergilikti ózin-ózi basqarý organy, olardyń laýazymdy tulǵasy nemese qyzmettik tulǵasy, basqa da sýbekt bolyp tabylatyn daýlardy qarastyrady.

Ákimshilik sotqa jarııaly-quqyqtyq qatynas salasyndaǵy jarııalyq quqyǵy, bostandyǵy nemese múddesi buzyldy dep eseptegen adam ákimshilik talap qoıa otyryp júginýge quqyǵy bar.

«Bizdiń kózqarasymyzsha, is júrgizýdi jeńildetý jáne azamattardyń quqyǵyn eń joǵary deńgeıde qorǵaý maqsatynda ákimshilik sot isin júrgizýde «jazbasha is júrgizýdi» engizý qajet, ıaǵnı sot otyrysyn ótkizbesten jáne taraptardyń qatysýynsyz dáleldemelerdiń bolýy negizinde isterdi qarastyrý jáne sheshý kerek», - degen pikirin bildirdi Ákimshilik sottyń tóraǵasy Qanat Dúısembıev.

Kezdesý qorytyndysy boıynsha qatysýshylar zań jobasy sottardyń ákimshilik isterdiń sapasyn arttyrýǵa, jarııaly-quqyqtyq daýlardy sheshýdiń naqty tártibin saqtaýǵa múmkindik beredi degen qorytyndyǵa keldi.