QR Ádilet mınıstri kórshi elmen arada azamattardyń quqyǵyn qorǵaý týraly zańǵa túsinik berdi

ASTANA. QazAqparat – Búgin QR Parlamentindegi Jibek Joly telearnasynyń mobıldi stýdııasynda QR Ádilet mınıstri Azamat Esqaraev palata otyrysynda qabyldanǵan zań talaptaryn túsindirdi, dep habarlaıdy QazAqparat tilshisi.

Aıta keteıik, búgin Májilistiń jalpy otyrysynda «1996 jylǵy 26 tamyzdaǵy Qazaqstan Respýblıkasy men Qyrǵyz Respýblıkasy arasyndaǵy azamattyq jáne qylmystyq ister jónindegi ózara quqyqtyq kómek kórsetý týraly shartqa ózgerister men tolyqtyrýlar engizý týraly hattamany ratıfıkatsııalaý týraly» Zańy qabyldandy.

Hattamany ratıfıkatsııalaý Qazaqstan men Qyrǵyzstan azamattarynyń quqyqtaryn qorǵaýǵa baǵyttalǵan azamattyq jáne qylmystyq ister boıynsha quqyqtyq kómek kórsetý salasyndaǵy ekijaqty yntymaqtastyqty odan ári nyǵaıtýǵa yqpal etetin bolady.

«Bul qujat eki el arasynda azamattyq ári qylmystyq ister boıynsha ózara quqyqtyq kómek kórsetýge arnalǵan. Shart 1996 jyly bekitilgen edi. Sodan beri biraz ýaqyt ótip, zańnama da ózgerdi. Sondyqtan eki eldiń de memlekettik organdarynda quzyretteri ózgerip, basqa vedomstvolardyń qaraýyna aýysty. Máselen, buryndary bizde memlekettik tergeý komıteti bolǵan. Atalǵan shartta bul vedomstvo qamtylǵan bolatyn. Qazirgi zańnama talaptaryna sáıkes keltirý úshin osy shartqa ózgerister engizý qajet», - dedi A. Esqaraev.

Osy oraıda ol qujatta memlekettik tergeý komıtetine jasalǵan siltemeler joıylǵanyn aıtty.

«Іshki ister organdarynyń quzyreti ózgerýine qatysty tıisti ókilettik Bas prokýratýranyń qaraýyna berildi. Qazir shetelmen azamattyq ári qylmystyq ister boıynsha qarym-qatynasta negizgi organ retinde Bas prokýratýra men Joǵarǵy sot qamtylǵan. Bul turǵyda osy jańa tártip atalǵan hattamaǵa engizildi», - dedi mınıstr.

Aıta keteıik, Jibek Joly telearnasynyń mobıldi stýdııasy apta saıyn QR Parlamenti Májilisiniń jalpy otyrysyn tikeleı efırde kórsetýge múmkindik beredi. Interaktıvti resýrs qazaqstandyqtardyń áleýmettik ómirine áser etetin máseleler men qoǵam talaptaryn talqylaý boıynsha, zań shyǵarý protsesine qatysty málimet taratady. Tikeleı efır kún tártibindegi ózekti máselelerdi qamtyp, Jibek Joly jýrnalısterine depýtattyq korpýstyń jumysyna qatysty senimdi aqparatty telekórermenge live formatynda jedel jetkizýge jol ashady.