QPL: «Jeńis» on oıynnan keıin jeńiske jetti

<p>ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 20-týrynda alǵashqy oıynnyń nátıjesi belgili boldy.</p>

Týrnır kestesinde kósh sońynda kele jatqan elordalyq «Jeńis» Qyzylordanyń «Qaısar» komandasyn qabyldady. 

Elordalyq komanda bıyl Premer-lıgada ornyn saqtap qalýǵa tyrysady. Sondyqtan olar úshin árbir oıynnyń mańyzy artyp tur. 

Oıyn basynan elordalyq komandanyń belsendiligi baıqalyp turdy. Dese de jyldam gol soǵyp kete alǵan joq.

Oıynnyń 34-mınýtynda Georgıı Pantsýlaıa soqqan jalǵyz gol kezdesý taǵdyryn sheshti.

Osylaısha «Jeńis» qarsylasynan 1:0 esebimen basym tústi. Olar sońǵy ret 20 sáýirde «Turandy» jeńgen edi. Nátıjesinde elordalyq komanda on oıynǵa sozylǵan sátsizdik serııasyn toqtatty. 

Búgin, 14 qyrkúıekte «Turan» (Túrkistan) men «Shahter» (Qaraǵandy), «Astana» men «Qyzyljar» (Petropavl) kezdesedi.

Al 15 qyrkúıekte «Elimaı» (Semeı) men «Tobyl» (Qostanaı, «Aqtóbe» men «Jetisý» (Taldyqorǵan), «Ordabasy» (Shymkent) men «Atyraý» jasyl alańǵa shyǵady.