QPL: «Kaspıı» fýtbolshylary segizinshi márte jeńildi

ALMATY. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń on birinshi týry máresine jetti, dep habarlaıdy QazAqparat tilshisi.

Búgin atalǵan týrda eki oıyn ótkizildi. Qyzylordanyń «Qaısary» men Petropavldyń «Qyzyljar», Qaraǵandynyń «Shahteri» men Aqtaýdyń «Kaspıı» komandalary kezdesti.

Alǵashqy oıynda «Qaısar» men «Qyzyljar» fýtbolshylary jasyl alańǵa shyqty. Qos komanda bir-biriniń qaqpasynan sańylaý taba almady. Olar 0:0 esebimen teń tarqasty.

Al «Shahter» men «Kaspıı» arasyndaǵy kezdesýde qaraǵandylyq klýbtyń joly boldy. 11-mınýtta «Shahter» oıynshysy Gıdeon Baa esep ashty. Al 82-mınýtta aqtaýlyq Bekzat Qabylan tarazy basyn teńestirdi. Jeńisti goldy 87-mınýtta qaraǵandylyq Evgenıı Tkachýk soǵyp, «Shahter» qarsylasynan 2:1 esebimen basym tústi. Osylaısha «Kaspıı» segizinshi márte jeńildi.

Aıta keteıik, 26 qyrkúıekte ótken osy týrda «Taraz» ben «Tobyl» 0:0 esebimen teń túsken bolatyn. Al 27 qyrkúıekte «Qaırat» pen «Oqjetpes» 3:3 esebimen teń oınasa, «Astana» men «Jetisýdan» 3:0 esebimen basym tústi.

Endi 12-týr oıyndary 1 jáne 2 qazan kúnderi ótedi. Bul týrda 1 qazanda «Astana» men «Kaspıı», «Qaırat» pen «Shahter» komandalary kezdesse, 2 qyrkúıekte «Qaısar» men «Oqjetpes», «Ordabasy» men «Taraz», «Tobyl» men «Jetisý» komandalary sheberlik baıqasady.