QPL-2024: «Qaırat» el birinshiligin jeńispen bastady

<p>ASTANA. KAZINFORM - Búgin fýtboldan Premer-lıga komandalary arasyndaǵy el birinshiligin almatylyq &laquo;Qaırat&raquo; jeńispen bastady.&nbsp;</p>

Búgin, 2 naýryzda almatylyq «Qaırat» pen Petropavldyń «Qyzyljar» komandalary kezdesti.

Byltyr tórtinshi jáne besinshi oryn alǵan komandalar bıyl sol jetistigin jaqsartýǵa kúsh salady. Sondyqtan jankúıerler búgingi kezdesýden tarysty oıyn kútti.

Oıyn barysynda almatylyq klýb alǵashqy mınýttan gol soǵý múmkindigin arttyra tústi. Nátıjesinde 41-mınýtta Joao Paolo mergendigimen kózge tústi.

Al «Qyzyljar» fýtbolshysy Tımýr Mýldınov 62-mınýtta tarazy basyn teńestirse, almatylyq klýbtan Gıorgı Zarıa 71-mınýtta qaıtadan «Qaırat» alǵa shyǵardy.

Kezdesýde almatylyq klýb qarsylasynan 2:1 esebimen basym tústi.

Dál qazir taǵy bir kezdesýdiń nátıjesi belgili boldy. Petropavl qalasynda Semeıdiń «Elimaı» klýby «Atyraý» klýbyn qabyldady. Óz alańynyń daıyn bolmaýyna baılanysty semeılik klýb kezdesýdi Petropavlda ótkizýge májbúr.

Kezdesýde komandalar 0:0 esebine qanaǵat bildirdi.

Sondaı-aq, 1 naýryzda «Astana» «Jeńisti» 2:0 esebimen jeńse, «Qaısar» «Aqtóbege» 1:3 esebimen jol berdi.

Endi búgin «Ordabasy» (Shymkent) men «Shahter» (Qaraǵandy), «Tobyl» (Qostanaı) men «Turan» (Túrkistan) sheberlik baıqasady.