"Qozy Kórpesh-Baıan sulý" qoıylymy halyqaralyq básekeden gran-prı ıelendi
Bıylǵy festıval KSRO Halyq artısi, qyrǵyz halqynyń kórnekti teatr jáne kıno aktrısasy Baken Qydykeevanyń 100 jyldyǵyna arnaldy.
Festıvalde 6 sheteldik jáne 8 qyrǵyz teatry óz baqtaryn synap, óner kórsetti. «ART ORDO – 2023» halyqaralyq teatr festıvaline ár elden teatr qaıratkerleri men teatr zertteýshileri shaqyryldy.
Halyqaralyq qazylar alqasyn Qazaqstan Respýblıkasynyń Halyq ártisi, Qazaqstan Respýblıkasy Memlekettik syılyǵynyń laýreaty, Astana Jastar teatrynyń kórkemdik jetekshisi, professor Nurqanat Jaqypbaı basqardy. Sonymen qatar, qazylar alqasynyń quramynda Ózbekstan Respýblıkasynyń Halyq ártisi, Ózbekstan Respýblıkasynyń Ulttyq akademııalyq drama teatrynyń aktrısasy Gaýhar Zakırova (Ózbekstan), Qyrǵyz Respýblıkasynyń Halyq ártisi, Qazaqstan Respýblıkasynyń Eńbek sińirgen ártisi, aktrısa Gúlsara Ájibekova (Qyrǵyzstan), Ázerbaıjan Respýblıkasynyń Halyq ártisi, Ázerbaıjan Respýblıkasynyń eńbek sińirgen mádenıet qaıratkeri, teatr jáne kıno akteri, rejısser, professor Novrýzov Djahangır Mýtallıb ogly (Ázirbaıjan), Qyrǵyzstan Teatr Qaıratkerleri odaǵynyń prezıdenti, ónertaný kandıdaty Janysh Qulmambetov (Qyrǵyzstan), teatr synshysy, ónertaný kandıdaty, dotsent Aısulý Saǵıtova (Bashqurtstan, Reseı), teatr synshysy jáne rejısseri Ismaıl Dıkılıtash (Túrkııa) boldy.
Halyqaralyq qazylar alqasy úzdik qoıylym – bas júlde, úzdik rejısser, úzdik stsenografııa, úzdik er adam róli, úzdik áıel adam róli, ekinshi plandaǵy er adam róli, ekinshi plandaǵy áıel adam róli, synshylar kózaıymy nomınatsııalary boıynsha júldegerlerdi anyqtady.
Qyrǵyzstan kórermeni Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń spektaklin zor yqylaspen qabyldady. Sahnada akterlardan basqa, orkestr de óner kórsetti. Bul dramalyq shyǵarmanyń áserin arttyra tústi. Halyq aspaptar orkestri barlyq mýzykalyq partııalardy jandy mánerde oryndap, spektalge ózgeshe sıpat berdi. Sahnada eski zaman hıkaıasy zamanaýı áýenmen órbip otyrdy. Tipti Maıkl Djeksonnyń da ánderinen úzindi oryndaldy. Osylaısha, avtor klassıkalyq qur baıandaýdan bas tartyp, Qozy Kórpesh pen Baıan Sulýdyń mahabbat hıkaıasyn zamanaýı tásilde jetkize bilgeni úshin ádil qazylar alqasynyń sheshimimen Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń ujymy Ǵ.Músirepovtyń «BAıAN SULÝ – QOZY KÓRPESh» spektakli úshin GRAN-PRI júldesimen jáne «TÚRKSOI» Halyqaralyq túrki mádenıeti uıymynyń arnaıy syılyǵymen marapattaldy.
Qoıýshy rejısser – Gúlnaz Balpeıisova, dırıjer – Maraljan Myrzaqulova, qoıýshy sýretshi – Qanat Maqsutov, kıim sýretshisi – Alma Syrbaeva, horeograf – Ilmıra Imanǵazına, kompozıtor – Oleg Sınkın.
Spektaklde Qazaqstannyń eńbek sińirgen qaıratkeri A.Nógerbek, «Daryn» Memlekettik Jastar syılyǵynyń laýreaty J.Erbolat, «Serper» syılyǵynyń laýreattary – Sh.Ordabaev, O.Jaqypbek, aktrısa A.Jetpisbaeva, akter N.Esen, M.Namenov, B.Shalqar, S.Anvarova, B.Qalıla, A.Mamyr, Á.Bektas, M.Makıbaeva jáne halyq aspaptar ansambli óner kórsetti.