Qojamjarov sheteldegi aqshany elge qaıtarýǵa qatysty túsinik berdi
Indýstrııalandyrý kúnine arnalǵan jıynda QR Prezıdenti Nursultan Nazarbaev shetelde jatqan aqshany qaıtarýǵa tapsyrma bergen bolatyn. Qazirgi esepke sáıkes, 18 otandyq kompanııa 12,5 mlrd dollardy shetelde ustap otyr. Búgin Astanada bastalǵan xalyqaralyq konferentsııada Qaırat Qojamjarov osy aqshany qaıtarý máselesin kóterdi.
Agenttik basshysynyń aıtýynsha, qazirgi zańnamada ulttyq kompanııalardyń aqshany shetelge shyǵarýyna qatysty naqty shekteý joq.
«Qazirgi jaǵdaıda aqshany elge qaıtarylǵany qajet. Prezıdent osy máselege basa nazar aýdardy. Qoldanystaǵy zańnamada naqty shekteý joq. Degenmen, ol jumysty jasaýǵa ábden bolady dep oılaımyn. Onymen Úkimet te, ulttyq kompanııa basshylary da aınalysady. Endi, bul - urlanǵan, ıa bolmasa, qylmystyq jolmen kelgen aqsha emes. Ol - Qazaqstannyń óz aqshasy, resmı qarajaty. Ony elge qaıtarý qajet. Osy jumysqa biz de atsalysatyn bolamyz», - dedi Qojamjarov jýrnalısterge bergen suxbatynda.
Aıta keteıik, Prezıdent Nursultan Nazarbaev sheteldegi qarjyny qaıtarýǵa qatysty arnaıy zańnamany ázirleýdi tapsyrdy. Memleket basshysynyń aıtýynsha, búginde 18 otandyq kompanııa 12,5 mlrd dollardy shetelde ustap otyr. Atap aıtqanda, «Teńiz Shevroıl» kompanııasy - 4,5 mlrd dollar, «QazMunaıGaz» ulttyq kompanııasy - 3 mlrd dollar, «QazMunaıGaz barlaý men óndirý» kompanııasy - 2 mlrd dollar, «Azııa gaz qubyry» JShS - 1 mlrd-tan astam, «Beıneý-Shymkent» gaz qubyry» JShS - 100 mln dollar, budan bólek, «Shyǵys Tsement», «Jaıyq Munaı», Kaspıı qubyry konsortsıýmy jáne taǵy basqa kompanııalar shetelde qyrýar qarajatty ustap keledi. «Nege olaı isteısizder? Qazaqstannyń resýrstaryn satyp, aqsha tabasyzdar? Al tabysty shetelde ustaısyzdar. Nege ol aqsha osynda aınalyp, el ekonomıkasyna jumys istemeıdi? Jarty jyldyń ishinde memleketke qarasty kompanııalar sheteldegi qarjysyn 2 mlrd dollardan 6 mlrd-qa deıin ulǵaıtty. Sizder neni kútip otyrsyzdar?! Men osyny túsinbeımin», - dep atap kórsetti Prezıdent jalpyxalyqtyq telekópir kezinde .