Qojamjarov: Áskerı qurylymdardyń janar-jaǵarmaı saqtaıtyn qoımalarynyń jaǵdaıy alańdatady
«Bizdi alańdatyp otyrǵan kúrdeli jaǵdaı – elimizdegi áskerı quramdardyń janar-jaǵarmaı saqtaıtyn qoımalarynyń sapasy men qaýipsizdigi. Sebebi bıyl Qorǵanys mınıstrliginiń atalmysh qoımalarynyń 85 paıyzynyń qyzmet kórsetý merzimi ótip ketken. Al kelesi jyly olardyń bári de jaramsyz bolmaq. Sol sııaqty Shekara qyzmeti men Ulttyq ulannyń jabdyqtalýy 52 jáne 30 paıyzdy quraıdy. Otynnyń qajetti qory bolmasa, ne ol sapasyz bolsa áskerı tehnıka jedel túrde, ásirese tótenshe jaǵdaılarda óz mindetterin oryndaı almaıdy», - dedi Qaırat Qojamjarov Parlament Senatynyń otyrysynda.
Onyń aıtýynsha jaqynda Qaraǵandy oblysynyń áskerı bólimderiniń birinde jaramsyz qoımadan jarty mıllıard teńgeniń janarmaıy aǵyp ketkenin aıtyp ótti.
«Mundaı oqıǵalar ekologııaǵa keltiriletin zalaldy aıtpaǵanda áskerı qyzmetkerler men jaqyn mańdaǵy eldimekenderdiń turǵyndarynyń ómiri men densaýlyǵyna qaýip týǵyzady. Ókinishke qaraı týra bir jyl buryn mundaı qaıǵyly jaǵdaı ońtústik óńirde oryn alyp, adam ólimi men orasan zor materıaldyq zalalǵa soqtyrdy», - dedi ol.
Senator osy jyldyń naýryzynda Memleket basshysy Qasym-Jomart Toqaev Qorǵanys mınıstrimen kezdesý barysynda oq-dárilerdi saqtaý nysandarynyń, polıgondardyń, áskerı qalashyqtardyń jáne jalpy áskerı kúshterdiń ınfraqurylymyn jetildirý boıynsha qajetti jumystardy júrgizýdi tapsyrǵanyn eske saldy.
«Memlekettik qorǵanys tapsyrysy aıasynda osy máseleni túkpilikti sheshýdi suraımyz», - dedi Qaırat Qojamjarov.