Kózge kórinbeı júrgen jumysymyz elenetin boldy - volonter stýdent

ASTANA. QazAqparat - Elimizdiń iri qalalarynda ótip jatqan sharalarda eriktilerdiń jumysy kózge kórine bermeıdi. Dese de, Memleket basshysynyń ózi eriktilerdiń eńbegin baǵalap, volonterlikpen aınalysatyn JOO stýdentteriniń shákirtaqysyn 30 paıyzǵa arttyrýdy tapsyrýy - jastarǵa úlken qoldaý bolyp otyr. Eýrazııa ulttyq ýnıversıtetiniń 4-kýrs stýdenti Erasyl Abykenov Jastar jylyna qatysty osyndaı pikir bildirdi, dep habarlaıdy QazAqparat tilshisi.

Oqý ornyna kelgeli ýnıversıtettiń qoǵamdyq jumystaryna belsene qatysyp, erikti retinde ózin kórsete bilgen jas jigit keıin qalalyq deńgeıdegi kóptegen merekelik sharalarǵa atsalysqan. Odan ózge, Erasyl jeke eriktiler tobyn qurǵan. Tobymen birge qaladaǵy balalar úılerine, az qamtylǵan otbasylarǵa jáne jalǵyzbasty analarǵa baryp, kómek berip turady.

«Astana qalasynda tyl eńbekkerleri jáne soǵys ardagerleri turyp jatyr. Ol jandardy kóbine tek mereke kúnderi eske alady. Al biz, keminde aıyna eki ret ol kisilerge baryp, qal-jaǵdaıyn bilip turýǵa tyrysamyz. Meniń oıymsha, eriktilerdiń basty jumystarynyń biri - osy. Budan basqa, respýblıkalyq deńgeıdegi kóptegen forýmdarǵa qatystym. Atap aıtar bolsaq, byltyr «Jas Otan» JQ respýblıkalyq forýmy, keshegi Elbasymyzdyń qatysýymen ótken Jastar jylynyń ashylýy jáne ózge de kóptegen kontserttik sharalar tájirıbemizdi shyńdaı tústi», - deıdi stýdent.

Erasyl Abykenovtyń aıtýyna qaraǵanda, eriktiler jumysy kóbine kózge kórinbeıdi.

«Bylaısha aıtqanda, barlyq usaq-túıek jumystardy eriktiler atqaryp júr desem, qatelespeımin. Qonaqtardyń kelýi, olardy belgili bir jerge deıin adastyrmaı aparý, uıyqtap qalmaýyn qadaǵalaý, jalpy olardy baqylaýda ustaý - osynyń barlyǵy ózindik qıyndyqtary bar jumys. Kóbine eriktiler jumysy elenbeı jatady. Sondyqtan Elbasymyzdyń osy oraıdaǵy bastamasy oryndy dep oılaımyn. Qansha tólenetini mańyzdy emes, bastysy - eleýsiz qalǵan eńbek elenetin boldy», - deıdi ol.

Stýdent eriktiler jumysy eshbir qarajatpen eseptelmeıtinin, erikti bolý arqyly jastar ózin ózi damytatynyn, ortamen sóılesý, jańa dostar tabý, ózin jumysqa úıretý, óz erkimen jeke jumys atqara alý qyrlaryn shyńdaıtynyn aıtady.

«barshamyzǵa belgili, Elbasy 2019 jyldy Jastar jyly dep jarııalady. Bul neni bildiredi? Bul osy jyly jastardyń saıasatta, memleketimizdiń damýynda jáne de qoǵamdyq ómirinde úlken orynǵa ıe bolatynyn bildiredi. Jastar jyly - kóptegen jigerli jastar úshin úlken múmkindik. Jańa tyń ıdeıalardy júzege asyrýǵa arnalǵan «tramplın» dep aıtsaq bolady. Elbasy óz sózinde «jas eriktilerge kóptep qoldaý jasaý kerek» dep atap ótken bolatyn. Jastar jylynyń qalaı ótetini tek ózimizge baılanysty bolmaq», - deıdi Erasyl Abykenov.

Eske sala ketsek, Prezıdenttiń qatysýymen Qazaqstanda Jastar jyly resmı túrde bastalǵan bolatyn. Memleket basshysy Astanada uıymdastyrylǵan «Táýelsizdik urpaqtary» atty saltanatty sharada jas mamandar men otbasylardy qoldaýǵa qatysty birqatar tapsyrmalar júktegen edi.

Sonymen birge, Prezıdent Memleket basshysy Nursultan Nazarbaev Úkimetke volonterlikpen aınalysatyn JOO stýdentteriniń shákirtaqysyn 30 paıyzǵa arttyrýdy tapsyrǵan bolatyn.