Qozǵalysy toqtatylǵan poıyzǵa bılet alǵan jolaýshylar aqshasyn qalaı qaıtara alady

NUR-SULTAN. QazAqparat - Qozǵalysy toqtatylǵan poıyzdarǵa bılet alǵan jolaýshylar jumsaǵan qarajattaryn qaıtaryp ala alady. Bul týraly «Jolaýshylar tasymaly» AQ bas dırektorynyń mindetin atqarýshy Asylhan Qaldykózov aıtty, dep habarlaıdy QazAqparat tilshisi.

«Qozǵalysy toqtatylǵan poıyzdarǵa erterek bılet satyp alǵan jolaýshylar aqshalaryn tolyq kólemde qaıtaryp ala alady. Sonymen qatar ózge balama poıyzdarǵa da bılet alýlaryna múmkindikteri bar», - dedi ol Ortalyq kommýnıkatsııalar qyzmetindegi brıfıng barysynda.

Asylhan Qaldykózovtiń aıtýynsha, bılet kassalary shtattyq rejımde jumys isteı beredi. Týyndaǵan barlyq saýaldarǵa temirjol kóliginiń 105 anyqtama qyzmetine qońyraý shalyp, jaýap alýǵa bolady.

Buǵan deıin habarlaǵanymyzdaı, 5 shildeden bastap, QR Indýstrııa jáne ınfraqurylymdyq damý mınıstrliginiń kelisimimen Almaty-Saryaǵash baǵytyndaǵy poıyz ýaqytsha toqtaıdy. Sonymen qatar áleýmettik mańyzy bar birneshe poıyzdyń qozǵalys jıiligi qysqartylady. Olar: Nur-Sultan-Almaty, Almaty-Pavlodar, Nur-Sultan-Óskemen jáne Nur-Sultan-Dostyq poıyzdary.