Qoı túrindegi paradan bas tartqan polıtseı medalmen marapattaldy
Іshki ister mınıstri Marat Ahmetjanovtyń buıryǵymen ishki ister organdarynyń birden úsh qyzmetkeri «Quqyq tártibin qamtamasyz etýge qosqan úlesi úshin»medaldarmen marapattaldy.
Olardyń biri Aqmola oblystyq Qylmystyq-atqarý júıesi departamentiniń qyzmetkeri Saltanat Jakenova. Qazan aıynyń ortasynda kolonııadan bosap shyqqan er adam Saltanat Jakenovaǵa qońyraý shalyp, oǵan bir qoı men aı saıyn azyq-túlikpen qamtamasyz etip otyrýdy usynyp, ózimen birge turatyn áıeldi probatsııalyq tekserýden bosatýdy suraǵan. Osyǵan baılanysty 37 jastaǵy aqmolalyq turǵyn ustalyp, ústinen para berýge qatysty qylmystyq is qozǵaldy.
Budan bólek, 21 qazanda elordadaǵy dúkenderdiń biriniń satýshysy 21 jasqa tolmaǵan azamatqa alkogol men temeki satqan. Ol ákimshilik jaýapkershilikten jaltarýǵa tyrysyp, ýchaskelik polıtsııa ınspektory Baqytjan Quljanovtyń kúrteshesiniń qaltasyna 50 myń teńge salǵan. Dál osy sát polıtseıdiń vıdeotirkegishine túsip qalady. Qazir sotqa deıingi tergeý júrip jatyr.
Al 24 qazanda Atyraý-Oral avtojolynda patrýldik polıtsııa qyzmetkeri Rızabek Sapanov Chevrolet Lacetti kóligin toqtatady. Rýlde Reseı Federatsııasynyń 32 jastaǵy azamaty otyrǵan. Onyń saqtandyrý polısi bolmaǵan. Kólik júrgizýshisi ınspektorǵa qujattaryn usynǵanda ózin ákimshilik jaýapkershilikten bosatý úshin syıaqy túrinde 500 rýbldi qosa bergen. Aqshany berip jatqan sát Sapanovtyń vıdeotirkegishine túsip qalǵan. Ol dereý oqıǵa ornyna Atyraý qalasy polıtsııa basqarmasynyń jedel-tergeý tobyn shaqyrady. Osy fakti boıynsha polıtsııa qyzmetkerleri Qylmystyq kodekstiń 367-baby 1-bóligi (Para berý) boıynsha sotqa deıingi tergep-tekserý amaldaryn bastady.