Qoı etin saýdalaý úshin jańa naryqtar kerek - AShM

ASTANA. QazAqparat - Aýyl sharýashylyǵy mınıstrligi Iranǵa eksporttyń artýyna baılanysty Qazaqstanda qoı eti boıynsha tapshylyq bolmaıtynyn málim etti, dep habarlaıdy QazAqparat tilshisi.

Búgin Parlament Májilisiniń jalpy otyrysynda depýtattar «Iran nemese basqa da elderge et ónimderi eksportynyń artýy Qazaqstannyń ishki naryǵynda etke degen tapshylyqty týyndatýy múmkin be?» degen saýal qoıdy.

Óz kezeginde QR Aýyl sharýashylyǵy vıtse-mınıstri Erlan Nysanbaev qoı eti boıynsha ishki naryqta problema joq ekenin atap ótti.

«Qoı eti boıynsha ishki naryqty tolyǵymen qamatamasyz etip otyrmyz. Kerisinshe, bizge búginde jańa naryq kerek, onyń biri qoı etin eksporttaýǵa qatysty. Ótken jyly qabyldanǵan memlekettik baǵdarlamaǵa sáıkes, bizde aldaǵy 10 jylda mal sharýashylyǵy ónimin kóbeıtý josparlanyp otyr», - dedi vıtse-mınıstr.

Osy oraıda, qoı eti elimizde artyǵymen óndirilgennen keıin, onyń baǵasy birqalypty ekenin atap ótti.

«Al iri qara mal etine toqtalsaq, búginde tolyq monıtorıng júrgizýdemiz. Bul baǵytta da problema bolmaıdy dep esepteımiz», - dedi Erlan Nysanbaev.

Bul máselede Májilis tóraǵasy Nurlan Nyǵmatýlın elimizdiń ishki naryǵynda et ónimderi boıynsha tapshylyq bolmaýy kerektigin, sondaı-aq et baǵasy boıynsha problemanyń týyndaýyna jol bermeý qajettigin qadap aıtty.

Budan buryn habarlanǵandaı, Qazaqstan taýarlaryn Iranǵa eksporttaý jeńildeıdi. Osy oraıda Májilisiniń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisimdi ratıfıkatsııalaý týraly» zań jobasy maquldandy.

2018 jyly Iranǵa Qazaqstan 2 200 tonna qoı etin eksporttady.

Aıta keteıik, jaqynda Aqmola oblysy ettiń alǵashqy partııasyn Iran Islam Respýblıkasyna baǵyttady.