Kovıdke qarsy dári-dármek baǵasy qalaı turaqtaldy

NUR-SULTAN. QazAqparat – QR Básekelestikti qorǵaý jáne damytý agenttiginiń tóraǵasy Serik Jumanǵarın ótken jyly kovıdke qarsy dári-dármek baǵasynyń qalaı turaqtalǵanyn aıtyp berdi, dep habarlaıdy QazAqparat.

Monopolııaǵa qarsy 36 sýbektimen jasalǵan komplaens qorytyndysy boıynsha PTR-test qyzmetteriniń baǵasy 15-ten 9 myń teńgege deıin, sodan keıin 9-dan 7,5 myń teńgege deıin tómendedi.

2021 jyly 6 jeltoqsanda Ulttyq saraptama ortalyǵy COVID-19-ǵa PTR-test ótkizý qyzmetiniń qunyn 6,4-ten 4,9 myń teńgege deıin tómendetti.

«Dárilik zattar boıynsha 8 óńirdegi 30 naryq sýbektisimen, aqyly medıtsınalyq qyzmetter boıynsha – 15 naryq sýbektisimen monopolııaǵa qarsy komplaens jasaldy. Dárilik zattar naryǵynda 7 256 taýarǵa shekti baǵalar kelisildi, onyń ishinde kovıdke qarsy 84 dárilik zat bar, onyń 6,5 myńy boıynsha baǵalar burynǵy deńgeıde qaldy, 382-sine – shekti bólshek saýda baǵalarynyń orta eseppen 20,7%-ǵa ósýi baıqalady, 90 dáriniń baǵasy orta eseppen 14,5%-ǵa tómendedi», - dedi S. Jumanǵarın Básekelestikti qorǵaý jáne damytý agenttigi alqasynyń otyrysynda.

Onyń aıtýynsha, baǵany retteýdiń erekshe tártibi engizilip, 23%-ǵa tómendetilgen kovıdke qarsy dárilerdiń shekti baǵalary qaıta qaraldy.