Kóterme taratý ortalyqtary qaı merzimde tapsyrylady

NUR-SULTAN. QazAqparat – Búgin Úkimet otyrysynda Saýda jáne ıntegratsııa vıtse-mınıstri Erjan Qazanbaev kóterme taratý ortalyqtary qashan salynatynyn aıtty, dep habarlaıdy QazAqparat tilshisi.

«Saýda salasyndaǵy memlekettik saıasattyń negizgi mindeti – keshendi saýda-logıstıkalyq ınfraqurylym qurý arqyly óndirýshiden tutynýshyǵa deıingi saýda-ótkizý tizbegin qurý bolyp sanalady. Ulttyq taýar ótkizý júıesin qurýdyń birinshi kezeńi aıasynda Memlekettik-jekeshelik áriptestik sharty jasaldy. Qazir jobalyq-smetalyq qujattama ázirlenip jatyr. 2022 jylǵy qańtarǵa deıin 2 kóterme taratý ortalyǵyn jańǵyrtyp tapsyrý josparlanyp otyr», - dedi E. Qazanbaev.

Onyń aıtýynsha, qalǵan kóterme taratý ortalyqtarynyń qurylysyn 2022 jyldyń qańtar aıynda bastap, tamyz aıyna deıin aıaqtaý josparlanyp otyr.

«Ekinshi kezeńde 17 kóterme taratý ortalyǵyn salý josparlanýda. Jeke áriptespen birlesip, marketıngtik taldaý júrgizildi, jer ýchaskeleriniń 70 paıyzy anyqtaldy jáne olardy bólý boıynsha rásimder bastaldy. Ekinshi kezeń boıynsha Memlekettik-jekeshelik áriptestik shartyn jasasý 2022 jylǵy sáýirde, al paıdalanýǵa tapsyrý 2024 jylǵy tamyzda josparlanǵan», - dedi vıtse-mınıstr.

Budan buryn habarlanǵandaı, 2021-2025 jyldary kezeńinde «Ulttyq taýar jetkizýshi júıesin» qurý maqsatynda aýyl sharýashylyǵy ónimderin saqtaý jáne satý boıynsha 24 kóterme taratý ortalyǵy salynady.