Qosymsha oqý aptasy muǵalimniń de, shákirttiń de oqý júktemesin tómendetedi – ustazdar pikiri

ASTANA. QazAqparat – Qoǵamda oqý jylynyń 2 aptaǵa uzartylýy qyzý talqyǵa túsip jatqany belgili. Osy jaıtqa oraı mektep ustazdarynyń pikirin bilgen edik, dep habarlaıdy QazAqparat tilshisi.

Elordadaǵy Sáken Seıfýllın atyndaǵy №80 mektep-gımnazııanyń dırektory Gúlmıra Jármenova qosymsha oqý aptasy muǵalimniń de, shákirttiń de kúndelikti oqý júktemesin tómendetetindigin aıtady.

«2022-2023 oqý jylynda memlekettik standartqa sáıkes 36 aptalyq oqý jyly uzaqtyǵy engizilgeni málim. Qosymsha oqý aptalarynyń qosylýy kúndelikti sabaq sanyn, ıaǵnı muǵalimge de, oqýshyǵa da kúndelikti oqý júktemesin azaıtty. Pedagogterdiń jumys tıimdiligin arttyryp, shákirtterdiń materıaldy tereń meńgerýine yqpal jasady. Mektebimizde sabaq kúntizbelik josparǵa saı júrgizilýde. Barlyq synyp oqýshylary sabaqqa túgel qatysyp, uıymdastyrylǵan is-sharalarda belsendilik tanytyp júr.

Sondaı-aq, qorytyndy attestatsııalaýǵa daıyndyq jumysymen qatar, mektep oqýshylary úshin 5 maýsymda bastalatyn jazǵy lagerde demalýdyń qyzyqty baǵdarlamasyn ázirlep jatyrmyz», - dedi mektep basshysy.

Al osy mekteptiń qazaq tili jáne ádebıeti pániniń muǵalimi Kúnsáýle Saılaý oqý jylynyń uzaqtyǵy ustazdar úshin óte tıimdi bolǵanyn alǵa tartady.

«Sebebi oqý maqsattaryn keńinen qoldanýǵa jáne qosymsha ádebıetterdi oqytýǵa yńǵaıly bolyp tur. Oqýshylardyń oqýǵa degen yntasy, qyzyǵýshylyǵy óte joǵary ári belsendilik tanytyp, bilim alyp jatyr», - dedi ol.

Orys tili jáne ádebıeti pániniń muǵalimi Merýert Daýtbekova bolsa oqý jylynyń eki aptaǵa uzartylýy mektep oqýshylary úshin kúrdeli taqyryptardy zerdeleýge óte tıimdi ári mol múmkindik bergenin aıtady.

«Bul múmkindikterdi paıdalana otyryp, osy kúnderi joǵary synyp oqýshylarymen taqyryptyq kvız oıyndaryn ótkizýdemin. Jyl boıy ótken taqyrypty qorytyndylaý úshin óte qolaıly ekendigin baıqadym», - dedi muǵalim.

Buǵan deıin Oqý-aǵartý mınıstri Ǵanı Beısembaev oqý jylynyń uzartylýyna qatysty pikir bildirgen bolatyn.