Qosylǵan qun salyǵyn tóleýshiler bir kúnniń ishinde tirkeledi

NUR-SULTAN. QazAqparat – Qazaqstanda qosylǵan qun salyǵyn tóleýshiler bir kúnniń ishinde jáne tek elektrondy ótinim arqyly ǵana tirkeletin bolady. Bul týraly búgin zań jobalaý qyzmeti máseleleri jónindegi vedomstvoaralyq komıssııa otyrysynda QR Ulttyq ekonomıka vıtse-mınıstri Jasulan Mádıev aıtty, dep habarlaıdy QazAqparat tilshisi.

Otyrysta vıtse-mınıstr «Bıznes ahýaldy jaqsartý máseleleri boıynsha Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» zań jobasynyń tujyrymdamasyn tanystyrǵan edi.

«Osy jyldyń 17 qyrkúıegindegi Premer-Mınıstrdiń tapsyrmasyna sáıkes, Ulttyq ekonomıka mınıstrligine múddeli memlekettik organdarmen jáne uıymdarmen birge qazan aıynyń sońyna deıin Úkimetke «Bıznes ahýaldy jaqsartý máseleleri boıynsha Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» zań jobasyn engizý tapsyryldy. Zań jobasynyń aıasynda bıznesti damytý úshin qolaıly jaǵdaı jasalýyna baılanysty elge ınvestorlar aǵynyn qamtamasyz etetin reformalar toptamasyn júzege asyrý josparlanyp otyr. Zań jobasy Qazaqstan Respýblıkasynyń 11 kodeksine, 43 zańyna ózgertýler men tolyqtyrýlar engizýdi kózdeıdi jáne qurylymy mynadaı 5 negizgi bloktan turady: salyq organdarymen jumysty jeńildetý, aqparattarǵa jarııa qoljetimdilikti ashý, korporatıvtik basqarý jáne aktsıonerlermen jumys, protsedýralardy jeńildetý, básekege qarsy normalardy alyp tastaý jáne básekelestikti damytý», - dedi J.Mádıev.

Vıtse-mınıstr dereginshe, salyq organdarymen jumysty jeńildetý úshin qosylǵan qun salyǵy boıynsha salyq tóleýshi retinde tirkeýdi bir kúnniń ishinde jáne elektrondy ótinim arqyly ǵana júzege asyrý qarastyrylǵan.