Kostenko shahtasyndaǵy apattan qaza tapqandardyń otbasylaryna qandaı kómek kórsetiledi

<p>Qaraǵandy oblysynyń ákimdigi ýákiletti memlekettik organdarmen birlesip, Kostenko atyndaǵy shahtada bolǵan órt saldarynan qaza tapqan &laquo;ArselorMıttal Temirtaý&raquo; AQ jumysshylarynyń otbasy músheleriniń tizimin jasap jatyr. Memleket basshysynyń tapsyrmasy boıynsha olarǵa tolyqqandy kómek kórsetiletin bolady. Bul týraly Úkimettiń baspasóz qyzmetinen málim etti, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

QR Eńbek jáne halyqty áleýmettik qorǵaý mınıstri Svetlana Jaqypova Kostenko atyndaǵy shahtada bolǵan órt kezinde qaza tapqandardyń otbasylaryna qandaı kómek kórsetiletinin aıtty.

«Memleket tarapynan qazaq tapqan shahterlerdiń otbasylaryna asyraýshysynan aıyrylǵany úshin tólemder tólenedi. Birinshisi – bazalyq járdemaqy, ekinshisi – áleýmettik saqtandyrý qorynan, úshinshisi – ómirdi saqtandyrý kompanııasynan tólenedi. Tólemderdiń ortasha mólsheri 400 myńnan 500 myńǵa deıin jetedi. Jáne ol tólemder asyraýynda bolǵan jasóspirimder, 18 jasqa tolǵansha, eger balalar mektepten keıingi joǵary bilim alyp jatsa – 23 jasqa tolǵansha beriledi», - dedi mınıstr.

Sondaı-aq «ArselorMıttal Temirtaýdyń» ujymdyq shartyna sáıkes, kompanııa mindetti túrde qaza tapqan shahterdiń otbasyna 10 jyldyq eńbekaqysyn tóleıdi.

Oǵan qosa QR Úkimetiniń saıty kóz jumǵan jumysshylardyń januıalaryna kórsetiletin qoldaý sharalarynyń tolyq tizimin jarııalady:

– kompanııa qarajaty esebinen otbasylarǵa baspana satyp alý;

– moraldyq zııan úshin 10 jyldyq jalaqy mólsherinde birjolǵy tólem;

– asyraýynda bolǵan balalarǵa 18 jasqa tolǵanǵa deıin aı saıynǵy saqtandyrý tólemi (JOO stýdenti bolsa, 23 jasqa deıin);

– Memlekettik áleýmettik saqtandyrý qorynan jalaqysyna baılanysty aı saıynǵy tólem;

– qamqorlyqtaǵy adamdardyń sanyna baılanysty asyraýshysynan aıyrylý jaǵdaıy boıynsha aı saıynǵy memlekettik járdemaqy;

– jumys berýshiniń qarajaty esebinen otbasylardyń nesıelerin óteý;

– jerleýge baılanysty barlyq shyǵyndardy óteý;

– qaza tapqandardyń balalary men jubaılaryn jumysqa ornalastyrý;

– 23 jasqa deıingi balalardyń oqý aqysyn tóleý;

– qaza tapqandardyń jubaılary men balalaryna sanatorıı-kýrorttyq emdelýge joldamalar berý;

– úıdi peshpen jylytatyn otbasylarǵa jyl saıyn kómir bólý.

Memleket basshysynyń tapsyrmasyna sáıkes «ArselorMıttal Temirtaý» AQ-nyń qaza tapqan qyzmetkerleriniń otbasylaryna barlyq qajetti kómek kórsetý máseleleri QR Úkimetiniń erekshe baqylaýynda.

Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr.

Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.

Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.

29 qazan Jalpyulttyq aza tutý kúni bolyp jarııalandy.

Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.