Kostenko shahtasyndaǵy apat týraly sońǵy málimetter
Qaraǵandy oblysynyń ákimi Ermaǵanbet Bólekpaev áleýmettik jelidegi paraqshasynda habarlaǵanyndaı, apat kezinde shahtada 252 adam bolǵan, jer betine 205 shahter shyǵaryldy.
«Jedel shtab quryldy, onyń quramyna jaýapty adamdar men áriptesterim kirdi. Oqıǵa ornynda 40 qutqarýshy, 10 tehnıka jáne qaza tapqandar men zardap shekkenderdiń týystaryna kómek kórsetetin 3 psıholog jumys istep jatyr. Senim telefondary qosyldy: (8-7172) 49-72-70, (8-7212) 51-72-23. Qaza tapqan kenshilerdiń týystary men jaqyndaryna kóńil aıtamyn. Biz sizdermen birge bolamyz jáne osy qıyn kúnderde sizderdi qoldaımyz», - dep jazdy ákim.
Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi. Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy. Sondaı-aq, «ArselorMıttalTemirtaý» kompanııasymen ınvestıtsııalyq yntymaqtastyqty toqtatý tapsyryldy.
Kostenko shahtasynan taǵy 5 kenshiniń máıiti tabyldy. «252 adamnyń 205-i jer betine shyǵaryldy, onyń 18-i medıtsınalyq kómekke júgindi. 31 kenshini izdeý jalǵasyp jatyr. 16 shahterdiń denesi tabyldy», - dep habarlady «ArselorMıttal Temirtaý» AQ baspasóz qyzmeti.
Shahtadaǵy órt faktisi boıynsha Qylmystyq Kodekstiń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý» baby boıynsha sotqa deıingi tergep-tekserý bastaldy. Arnaıy prokýrorlardyń basshylyǵymen vedomstvoaralyq jedel-tergeý toby quryldy, onyń quramyna quqyq qorǵaý organdarynyń neǵurlym tájirıbeli qyzmetkerleri men TJM mamandary engizildi. Jergilikti jerde tergeý jumysyn Bas Prokýrordyń birinshi orynbasary Tımýr Táshimbaev pen ІІM Mınıstriniń orynbasary Qaırat Súntaev úılestiredi.
Professor H.J. Maqajanov atyndaǵy aýrýhanalarǵa 18 adam jetkizildi. Bir adam reanımatsııada jatyr. «Barlyq qajetti mamandardy tarta otyryp, konsılıým ótkizildi. 15 adam Ońtústik-Shyǵys shaǵyn aýdanyndaǵy H.J. Maqajanov klınıkasyna kómirtegi totyǵymen ýlaný belgisimen tústi. Bireýi aýyr dárejede kómirtegi totyǵymen ýlaný, qalǵandary jeńil jáne ortasha dárejede ýlaný dıagnozymen aýrýhanaǵa jatqyzyldy. Ekeýi Mıhaılovkadaǵy H.J. Maqajanov klınıkasyna tústi: bireýi reanımatsııada aýyr jaǵdaıda, ekinshisi operatsııadan keıin travmatologııa bóliminde jatyr. Sonymen, statsıonarǵa 17 adam jatqyzyldy, bir adam ambýlatorııalyq emdelýge jiberildi», - dep habarlady Qaraǵandy oblysynyń Densaýlyq saqtaý basqarmasy.
Memleket basshysynyń tapsyrmasyna sáıkes Premer-Mınıstr Álıhan Smaıylovtyń tóraǵalyǵymen apattyń sebepterin tergeý jáne onyń saldaryn joıý jónindegi Úkimettik komıssııa quryldy. Onyń quramyna Premer-Mınıstrdiń birinshi orynbasary Roman Sklıar, tótenshe jaǵdaılar mınıstri Syrym Sháriphanov, ishki ister mınıstri Erjan Sádenov, densaýlyq saqtaý mınıstri Ajar Ǵınııat, eńbek jáne halyqty áleýmettik qorǵaý mınıstri Svetlana Jaqypova, ónerkásip jáne qurylys mınıstri Qanat Sharlapaev, quqyq qorǵaý organdarynyń, Qaraǵandy oblysy ákimdiginiń, eńbek ınspektsııasynyń, «Qorǵaý» kómir óndirýshiler kásipodaǵynyń ókilderi jáne t.b. kirdi.
Sondaı-aq, Úkimet «ArselorMıttal Temirtaý» AQ aktsıonerlerimen aldyn ala ýaǵdalastyqqa qol jetkizgeni jáne kásiporynnyń menshik quqyǵyn Qazaqstan Respýblıkasynyń paıdasyna berý týraly kelisimshartty rásimdeý aıaqtalý ústinde ekendigi habarlandy.
Májilis depýtaty Erlan Saırov eńbekshilerdi qorǵaý jónindegi halyqaralyq uıymdar arqyly «ArselorMıttalTemirtaý» kompanııasynan moraldyq jáne materıaldyq ótemaqy alý kerektigin aıtty.
Shahtadaǵy órtten qaza tapqan kenshiler sany 20-ǵa jetti, keıin 21-ge jetti.
QR Densaýlyq saqtaý mınıstrligi zardap shekkenderge konsýltatsııalyq kómek kórsetý úshin quramynda toksıkolog, travmatolog-ortoped jáne neırohırýrg bar joǵary dárejeli dárigerler tobyn Qaraǵandyǵa jiberdi.
Memleket basshysy Qasym-Jomart Toqaev apattyń mán-jaıyn anyqtap, tıisti sheshim qabyldaý úshin Qaraǵandy oblysyndaǵy qaıǵyly oqıǵa bolǵan jerge bardy.
Shahtalar men kenishterde budan bylaı jumysshy ólimin boldyrmaý úshin kásiporynnyń ıesin aýystyrý azdyq etedi. Azamattyq, Kásipkerlik, Eńbek kodeksterin qaıta qaraý kerek. Parlament Májilisiniń Ekologııa máseleleri jáne tabıǵat paıdalaný komıtetiniń múshesi Arman Qalyqov Kazinform tilshisine bergen suhbatynda osyndaı pikir aıtty.
Senat tóraǵasy Máýlen Áshimbaev Kostenko shahtasynda opat bolǵan kenshilerdiń týǵan-týystaryna kóńil aıtty.
Qasym-Jomart Toqaev qaza tapqan kenshilerdiń otbasylarymen jáne týǵan-týystarymen kezdesip, kóńil aıtty. Prezıdent apattyń mán-jaıyn anyqtaý, kenshilerdi qutqarý jáne zardap shekkender men qaza tapqandardyń otbasylaryna shuǵyl kómek kórsetý jóninde qajetti sharalar qabyldanatynyn jetkizdi. Sondaı-aq 29 qazan elimizde Jalpyulttyq aza tutý kúni dep jarııalaıtynyn málimdedi.
Kostenko shahtasyndaǵy órtten qaza tapqan kenshilerdiń balalaryna barlyq qajetti qoldaý sharalary kórsetiledi. Bul týraly Oqý-aǵartý mınıstrliginiń Balalardyń quqyqtaryn qorǵaý komıtetinen aıtty.
Qaza tapqan kenshiler sany 22-ge jetti.
Vadım Basın «ArsellorMıtal Temirtaý» AQ Kómir departamentiniń bas dırektory bolyp taǵaıyndalady. Bul týraly Memleket basshysy Qasym-Jomart Toqaev Kostenko shahtasy kenshileriniń týǵan-týystarymen kezdesýde aıtty.
Kásibı áskerılendirilgen apattyq-qutqarý qyzmetteriniń Respýblıkalyq ortalyq shtaby Qaraǵandy fılıalynyń dırektorynyń birinshi orynbasary Gennadıı Sılınskıı málimdegendeı, saǵat 15:00-degi jaǵdaı boıynsha, 28 kenshiniń denesi tabyldy, 18 adam izdestirilip jatyr.
«ArsellorMıtal Temirtaý» AQ-ǵa tıesili 8 shahtanyń jumysy ýaqytsha toqtatyldy. «Barlyq shahtalardyń jumysy bir táýlikke toqtatyldy. Osy ýaqyt ishinde shahtalardaǵy gaz júıesiniń qaýipsizdigi tekseriledi», - dep habarlady kompanııanyń baspasóz qyzmeti.
Saǵat 16:00-degi jaǵdaı boıynsha, qaza bolǵan kenshilerdiń sany 32-ge jetti, 14 adam izdestirilip jatyr.
Prezıdent Qasym-Jomart Toqaev shahtada bolǵan apat saldaryn joıý jónindegi jedel shtab otyrysyn ótkizdi.
Zardap shekken kenshiler sany 20-ǵa jetti. Premer-Mınıstr Álıhan Smaıylov aýrýhanaǵa baryp, olardyń hálin bildi.
Sońǵy derekke saı, ıaǵnı saǵat 17:00-degi málimet boıynsha Kostenko shahtasynda 33 adam qaza bolǵany anyqtaldy. 13 adamdy izdestirý jalǵasyp jatyr.
Kenshiler opat bolǵan Kostenko shahtasy jaıly týraly derekti myna jerden oqýǵa bolady.
Keshki saǵat 19.30 kezinde Tótenshe jaǵdaılar mınıstri Syrym Sháriphanov jer astynda qalǵan 13 adam izdestirilip jatqanyn, biraq úmit óte az ekenin málim etti.
Qaraǵandy oblysynyń ákimi Ermaǵanbet Bólekpaev shahterlerdiń jalaqysy men jumys berýshiniń áleýmettik mindettemeleri jónindegi boljamdar men qaýesetterge qatysty jaýap berdi.
Mert bolǵan kenshilerdiń jeke basyn anyqtaý qıynǵa túsip jatqany aıtyldy.
Prezıdent Q.Toqaev 29 qazandy jalpyulttyq aza tutý kúni etip jarııalaıtyn Ókimge qol qoıdy.
QR Úkimeti apattan qaza tapqandardyń otbasylaryna qandaı kómek kórsetiletinin jarııalady.
Apatqa baılanysty Reseı, Belarýs, Ózbekstan, Qyrǵyzstan, Frantsııa prezıdentteri men Túrkııa Syrtqy ister mınıstrligi, Armenııa premeri kóńil aıtty.Prezıdent Qasym-Jomart Toqaev Qaraǵandy oblysyndaǵy qaıǵyly oqıǵaǵa oraı kóńil aıtqan barlyq shet memleketter basshylary men qazaqstandyqtarǵa rızashylyǵyn bildirdi.
Saǵat 23:45-tegi jaǵdaı: 13 kenshini izdestirý jalǵasyp jatyr. Jumystar túni boıy júrgiziledi.
29 qazan
Saǵat 09:00-degi jaǵdaı boıynsha, 35 kenshiniń qaza bolǵany anyqtaldy. 11 adamdy izdeý jalǵasýda.
Saǵat 10:00-degi aqparat boıynsha, Kostenko atyndaǵy shahtadaǵy órt saldarynan 36 kenshiniń mert bolǵany anyqtaldy.
14:00-degi jaǵdaı boıynsha, Kostenko atyndaǵy shahtada 38 adamnyń denesi tabyldy, 8 kenshini izdeý jalǵasýda.
Saǵat 15:00-degi jaǵdaı boıynsha Kostenko shahtasynan 42 adamnyń denesi tabyldy, 4 kenshini izdeý jalǵasýda.
Saǵat 20-00-degi jaǵdaı boıynsha 45 kenshiniń denesi tabyldy, 1 kenshi áli izdestirilp jatyr.