Kostenko shahtadasynǵy apatqa qatysty sotqa deıingi tergeý bastaldy - Bas prokýratýra

<p>Qaraǵandy oblysyndaǵy Kostenko atyndaǵy shahtadaǵy órt faktisi boıynsha taý-ken nemese qurylys jumystaryn júrgizý kezinde qaýipsizdik qaǵıdalaryn buzý baby boıynsha sotqa deıingi tergep-tekserý bastaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a> QR Bas prokýratýrasynyń baspasóz qyzmetine silteme jasap.</p>

"Ótken túnde Qaraǵandy oblysynda Kostenko atyndaǵy shahtadaǵy órt faktisi boıynsha taý-ken nemese qurylys jumystaryn júrgizý kezinde qaýipsizdik qaǵıdalaryn buzý baby boıynsha sotqa deıingi tergep-tekserý bastaldy (Qylmystyq Kodekstiń 277-babynyń 3-bóligi).

Arnaıy prokýrorlardyń basshylyǵymen vedomstvoaralyq jedel-tergeý toby quryldy, onyń quramyna quqyq qorǵaý organdarynyń neǵurlym tájirıbeli qyzmetkerleri men TJM mamandary engizildi.

Jergilikti jerde tergeý jumysyn Bas Prokýrordyń birinshi orynbasary Tımýr Táshimbaev pen ІІM Mınıstriniń orynbasary Qaırat Súntaev úılestirýde" delingen habarlamada.

Aıta keteıik, búgin tańerteń Kostenko atyndaǵy shahtada órt bolyp, 11 adam kóz jumǵanyn, ártúrli dárejedegi jaraqattarmen aýrýhanaǵa 18 adam jetkizilgenin jazǵan edik.

Artynsha taǵy bes kenshiniń denesi tabylyp, qurban bolǵandar sany 16-ǵa jetti.

QR Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtty.

Sondaı-aq, Prezıdent Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy.