Qostanaılyqtar sýyqta torda qamalǵan ıtterdiń jaǵdaıyna alańdaýly

QOSTANAI. QazAqparat – Qostanaılyq volonterler aýyl mańynda qamalyp turǵan ıtterdiń jaǵdaıyna alańdaýshylyq bildirdi, dep habarlaıdy QazAqparat tilshisi.

Turǵyndar Qostanaı aýdanynyń Mıchýrın aýyly mańynda tor qorshaýda qamalyp turǵan ıtterdiń vıdeosyn áleýmettik jelige taratqan.

Qaraýsyz qalǵan úı janýarlaryn qorǵaýmen aınalysatyn «Hope_kst» volonterlik uıymy ıtterdiń jaǵdaıyna alańdaýly.

«Qazir qarashanyń sýyq kezi. Itter dalada tor qorshaýda qamaýly. Turǵyndar olardyń vıdeosyn áleýmettik jelilerde bólisip jatyr. Torda turǵan ıtterdi alyp, baǵatyn qaıyrymdy jandar tabylatynyna senimdimiz», - deıdi volonter Gúlnur Meıramqyzy.

Bul jaǵdaıǵa qatysty Qostanaı aýdanynyń ákimdigi resmı málimdeme taratty.

«Atalmysh másele bizdiń baqylaýymyzda. Tańerteń aýdandyq veterınarlyq qyzmet bóliminiń mamandary qaraýsyz qalǵan ıtter qamalǵan orynǵa barady. Aldymen ıtterdiń fızıologııalyq jaǵdaıy tekserip, tıisti sharalary júrgiziledi. Qazirgi málimet boıynsha torǵa eki úlken ıt pen úsh kúshik qamalǵan. Olar arnaıy mamandardyń qaraýynda bolady. Keıin volonterlermen birigip, ıtterdi nıet bildirgen turǵyndarǵa taratamyz», - dedi Qostanaı aýdany ákiminiń baspasóz hatshysy Anar Kenjebekqyzy agenttik tilshisine.