Qostanaılyqtar memlekettik nagradalarmen marapattaldy

QOSTANAI.QazAqparat – Qostanaı oblysynyń ákimi Arhımed Muhambetov óńirdiń damýyna úles qosqan azamattarǵa memlekettik nagradalardy tapsyrdy, dep habarlaıdy QazAqparat oblys ákiminiń baspasóz qyzmetine silteme jasap.

Memleket basshysy Qasym-Jomart Toqaevtyń Jarlyǵymen 48 qostanaılyq memlekettik nagradalarǵa ıe boldy. Arhımed Muhambetovtiń aıtýynsha, bul – qajyrly eńbektiń nátıjesi jáne eńbekkerlerdiń qyzmetine berilgen joǵary baǵa.

«QR Tuńǵysh Prezıdenti-Elbasy Nursultan Nazarbaevtyń bastamasymen Eýrazııalyq ekonomıkalyq odaq qurylyp, jumys isteýde. Elimizde halyqtyń ál-aýqatyn jaqsartýǵa baǵyttalǵan memlekettik baǵdarlamalar tabysty iske asyrylyp jatyr. Koronavırýstyq ınfektsııa pandemııasy aıasynda qıyn jaǵdaıǵa qaramastan Qostanaı oblysynda da ekonomıkalyq kórsetkishterdiń ósýi baıqalady. Qostanaılyqtardy árdaıym eńbeksúıgish, jaýapty jáne óz isine berilgen der edim. Áleýmettik-ekonomıkalyq reformalardy júzege asyrýǵa qosqan zor úlesterińiz úshin sizderge jáne ujymdaryńyzǵa alǵys bildiremin», - dedi Arhımed Muhambetov saltanatty jıynda.

Sonymen, óńirdiń órkendeý jolynda aıanbaı ter tókken bes qostanaılyq «Qostanaı oblysynyń Qurmetti azamaty» ataǵyna ıe bolyp otyr. Olar: Uly Otan soǵysynyń ardageri, aqyn, jyrshy, jornalshy Qasymhan Aldabergenov, «Máskeleý» JShS dırektory Zeınolla Jańbyrshynov, «Jeleznodorojnoe AMF» JShS dırektory Maksım Artemýk, Qazaqstannyń eńbek sińirgen qyzmetkeri Baǵıla Baımaǵambetova jáne aqyn, dramatýrg Aqylbek Shaıahmet.

Budan bólek «Parasat» ordenimen «Frýnzenskoe» JShS dırektory Nıkolaı Sherer, «Qurmet» ordenimen Jitiqara aýdanynyń ákimi Abaı Ibraev, «Qostanaı mıneraldary» AQ Basqarma tóraǵasy Erbol Nurhojaev, «Ýspenovskoe» ShQ basshysy Anatolıı Sergeev, «Shaıhın» ShQ basshysy Ǵalymjan Shaıhın marapattaldy.