Qostanaılyqtar «Kitaphana túnine» jınaldy
L.Tolstoı atyndaǵy oblystyq ámbebap ǵylymı kitaphanasy dırektory Darıǵa Dúısebaevanyń sózinshe, bul shara osymen tórtinshi ret uıymdastyryldy.
«Oqyrmandarymyz úshin erekshe «Kitaphana túni» dástúrli jobaǵa aınaldy. Bul aýqymdy shara jyldan jylǵa jalǵasady. Negizgi maqsaty - oqyrmandardy kitapqa jaqyndatý, oqýǵa shaqyrý, sonymen qatar bizdiń qyzmetkerlerge jańa qyrynan tanylýyna múmkindik berý. Muraǵatta saqtalyp turǵan kóne jádirgerlermen jurtshylyqty tanystyrý. Sebebi, ol jerge basqa ýaqytta oqyrman turmaq, ózimizdiń qyzmetkerlerge de kirýge bolmaıdy. Bıylǵy «Kitaphana túninde» ertegi keıipkerleri men sıqyrshylar, batyrlar men balgerler óner kórsetedi», - deıdi Darıǵa Dúısebaeva
Oqyrmandar tún aýǵansha kitaphananyń muraǵat qoımalaryn emin-erkin aralap, mekeme qyzmetkerleri daıyndaǵan túrli tosyn syılarǵa kýá boldy. Kitaphanyń úsh qabatynda da ártúrli sheberlik mektepteri men kitap kórmeleri ótti.
«Ǵalamtor jaılaǵan zaman oqyrmandardyń belsendiligin tómendetkeni shyndyq. Sondyqtan osynadaı taǵylymdy sharalar tarıhı tanymymyzdy keńeıtetini anyq. Búgin kitaphanada buryn bola bermeıtin múmkindikterge qol jetkizdi. Sırek kitaptar qoryna kirip, ólkeniń baı tarıhymen tanystym. Munyń ózi bir ǵanıbet!» - dedi Bolat Kórkembaev esimdi oqyrman.
Án, bımen árlengen keshke kelýshiler túrli derekterge qanyq boldy. Al aqyndar rýhty óleńderin oqysa, sýretshiler kim úzdikti anyqtady. Oqyrmandardyń kóbi robot tehnıkasy sektsııasyna kelip, jas ónertapqyshtardyń týyndylaryn tamashalady.
Aıta keteıik, atalǵan is-shara túngi saǵat 01:00-ge deıin jalǵasty.