Qostanaılyqtar Arys qalasyndaǵy 450 úıdi qalpyna keltiredi
Arnaıy qurylǵan shtab quramyna óńirdegi belsendi azamattar engizilgen.
«Mundaǵy maqsat - ýaqyt ozdyrmaı tótenshe jaǵdaıǵa tap bolǵan Arys turǵyndaryna qoldan kelgenshe járdemdesý. Osy oqıǵadan keıin birinshi kúni-aq kóptegen memlekettik mekeme, kásiporyndar bir kúndik jalaqy aýdarý máselesin qoldady. Tek qana memlekettik organdardyń qyzmetkerleri zardap shekkenderge 20 mıllıon teńgeden astam qarjy aýdardy. Qazir ıgi is odan ári jalǵasyp jatyr. Budan jekemenshik mekemeler de bas tartyp jatqan joq. Máselen, «Qarasý» Holdıngi 3,5 mln teńge, «Mılh» JShS 1 mln teńge, «BK - Stroı» qurylys kompanııasy 2 mln teńge aýdardy. Sondaı-aq, «Olja-agro» JShS, «Baıan sulý» kondıter fabrıkasy tárizdi iri óndiris oryndary da bastamaǵa ún qosyp jatyr. qazirgi tańda Túrkistan oblysyna 20 tonna un, 7 tonna makaron ónimderi, «Baıan sulý» AQ 3 tonna kontıderlik ónimder jóneltti»,-dedi Arhımed Muhambetov baspasóz jıynynda.
Arnaıy shtab quramynda Qazaqstannyń Eńbek Eri Almat Tursynov, «Atameken» UKP OF jetekshisi Vasılıı Rozınov, «Jas qanat-2006» qus farıkasynyń basshysy Qaırat Maıshev, oblystyq máslıhattyń hatshysy Saılaýbek Eşanov, «Nur Otan» partııasy oblystyq bólimshesi tóraǵasynyń birinshi orynbasary Jańabaı Beısembaev sııaqty esimi kópke belgili azamattar bar.
Óńir basshysy Qostanaı oblysynyń Arys qalasyndaǵy qırap, búlingen 450 úıdi qalpyna keltirip beretinin aıtty. Qazir onda oblys ákiminiń orynbasary Sergeı Karplıýk bastaǵan delegatsııa jumys istep jatyr. Olar bir apta ishinde qıraǵan, búlingen úılerdiń shyǵynyn eseptep, qurylys jumystaryna qansha qarajat qajet ekendigin anyqtaıdy. Sodan keıin qurylysshylar naqty iske kirisetin bolady.
«Qandaı jaǵdaı bolmasyn, biz kómek berýge daıynbyz. Qıyn sátte qol ushyn sozý - paryz. Sondyqtan, osy sátti paıdalanyp men barsha qostanaılyqtardy Arystaǵy aǵaıynǵa qarjylaı qoldaýǵa shaqyramyn. Birligi bekem el ǵana alǵa ozady», - dep túıindedi oblys ákimi.
Sondaı-aq, oblystyq kásipodaqtar ortalyǵy «Sábı» gýmanıtarlyq kómek berý aktsııasynyń aıasynda 1 jasqa deıingi balalarǵa qostanaılyqtardyń atynan qajetti zattardy jınaýdy uıymdastyryp, barlyq qajetti zattardy búgin tústen keıin Túrkistan oblysyna attandyrdy. Onda balalar taǵamy, gıgıenalyq zattar, kıim-keshekter bar.
Tómende Arystaǵy zardap shekken aǵaıynǵa qarjylaı kómek berý úshin «Zdorove.kst» qoǵamdyq qorynyń rekvızıtin usynyp otyrmyz.
BIN 190140031149
IIK KZ 6010221000089191
AO «Naradnyı bank Kazahstana»
BIK HSBKKZKX
KBE 16
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.