Qostanaılyq jylý kompanııasyna laı sýdy tazalaý mindetteldi

QOSTANAI. QazAqparat - Qostanaılyqtardyń baspasóz ben áleýmettik jelilerde ystyq sý sapasyna shaǵymdanýy nátıjesinde prokýrorlyq tekserý jumystary júrgizildi. ­­­­ Onyń qorytyndysy kommýnaldyq qyzmetti jetkizýshi - Qostanaı jylý energetıkalyq kompanııasyna («QJEK» MKK) kóńilinen shyqpaıtyn edi..

Qalalyq prokýratýranyń habarlaýynsha oblys ortalyǵynyń túrli shaǵyn aýdandarynda, sonymen qatar áleýmettik-mádenı baǵyttaǵy nysandardan saraptama úshin alynǵan synamalarda «laılaný deńgeıiniń normadan joǵary» bolǵan. Ystyq sý tazalyǵynyń normatıvtik kórsetkishiniń buzylýy 2-den 9 esege deıin jetken. Qostanaılyqtardyń úıine laı, tottanǵan, las-qońyr tústi sý jetkizilip otyr.  Qadaǵalaý organynyń qyzmetkerleri buǵan Qostanaı jylý energetıkalyq kompanııasynda sapany jetkilikti baqylaýdyń joqtyǵy sebep bolyp otyrǵanyna senimdi.   

«Taratýshy jelide ystyq sý sapasy zerthanada baqylanbaıdy. Baqylaý oryndary tizimi tutynýshylar quqyǵyn qorǵaý departamentimen kelisilmegen. Sonymen qatar turǵyn úılerge jetkiziletin sýdyń mıkrobıologııalyq kórsetkishteri tekserilmeıdi», - dedi Qostanaı qalalyq prokýratýrasynyń áleýmettik-ekonomıkalyq saladaǵy zańnyń saqtalýyn baqylaý boıynsha bólim basshysy Aslan Syzdyqov. 

Qostanaı prokýratýrasy Qostanaı jylý energetıkalyq kompanııasynyń basshylyǵyna zańdy jáne normatıvtik talaptarǵa sáıkes olqylyqtardy joıyp, jumysty oń jolǵa qoıý talabymen usynys joldady.