Qostanaılyq sharýalar indetke qaramastan kásipterin toqtatqan joq
Memleket basshysynyń tapsyrmasyna sáıkes, óńirde shaǵyn jáne orta bıznesti damytýǵa arnalǵan keshendi baǵdarlamalar júzege asýda. Sharýalar qarjylaı qoldaýǵa ıe bolyp, indet tarap jatqan kezde de kásibin toqtatqan joq. Qostanaı oblysy, Amangeldi aýdanynyń turǵyny Boranbaı Ábeýov «Sybaǵa» baǵdarlamasymen iri-qara mal satyp alǵan.
Onyń aıtýynsha, karantın ýaqytynda memleket kómegi aıtarlyqtaı demeý boldy.
«Qajet kezde 42500 teńge kómek aldyq. Bul az qarajat bolyp kóringenimen, biraz adamǵa edáýir járdem boldy. Janar-jaǵarmaıymyzdy, tehnıkaǵa qajetti bólshekter satyp alsaq ta, kádege jarattyq. Negizi memleketten tólenetin qarjylaı kómek jyl boıyna berilse jaqsy bolar edi. Bul – kóptiń suraýy. Qazir shóp naýqany qyzǵan shaq. Ekinshiden, aýyl sharýashylyǵyna qajetti traktorlardy az paıyzben berse, jumys biraz jeńildeıdi», - deıdi kásipker.
Qazir Qostanaıda avtoóndiriske ekpin túsirilgen. Aımaqta qurastyrylǵan avtokólikter tek óz elimizde ǵana emes, shetel naryǵyna de shyǵarylýda. Bıyl jeńil avtokólikter shyǵarý ótken jylǵydan 72 protsentke kóbeıgen.
Mundaı oń ózgerister ónerkásiptiń ózge salalarynda da baıqalady. Ónerkásip oshaqtary ınvestıtsııa tartýda aıtarlyqtaı jumys atqarǵan. Jyl basynan beri oblys ortalyǵynda ónerkásip salasyna 23 mıllıard 300 mıllıon teńge qarjy quıylǵan. Bul ótken jyldyń osy kezeńimen salystyrǵanda 108 protsentke artyq.
Qazaqstanda shyǵarylatyn shekemtas pen asbesttiń basym bóligi Qostanaı oblysyna tıesili. Osy salada qostanaılyqtar elimizdiń eksporttyq qýatyn arttyrýǵa da úlesin qosyp, álemniń 60 shaqty eline taýar ótkizedi. Jalpy, oblys aýmaǵynda 700-ge jýyq ónerkásip oshaǵy turaqty jumys istep tur.