Qostanaılyq saıahatshy Túrkııa astanasyna velosıpedpen jetti
Birneshe kitaptyń avtory, jýrnalıst, sportshy, aýdarmashy jáne belsendi ómir saltyn ustanatyn Ernat Melisuly 5 qyrkúıekte – uly aǵartýshy, qazaq til biliminiń negizin salýshy A.Baıtursynulynyń týǵan kúninde Qazaqstannan velosıpedpen attandy.
Ol 17 qazanda 4600 shaqyrym joldy artta qaldyryp, Túrkııa astanasyna jetti. Qostanaıdan shyǵyp, áýeli Batys Qazaqstanǵa attandy. Odan keıin otandasymyz Ázerbaıjanǵa barýdy josparlaǵan edi, biraq belgisiz sebeptermen jabyq bolǵan shekara saıahatshynyń baǵytyn ózgertti. Taǵdyrdyń jazýymen shýaqty Grýzııa onyń jolyndaǵy alǵashqy shet el boldy. Onda ol Kýtaısı, Batýmı qalalaryna saıahattady. Odan keıin veloshabandoz qonaqjaı Túrkııaǵa bet alyp, Qara teńizdegi Rıze, Trabzon, Gıresýn, Orda jáne Samsýn qalalarynan ótip, Chorým jáne Kırıkkale qalalary arqyly Ankaraǵa baǵyt aldy. Qazaqstandyq saıahatshy Konıa, Býrsa jáne Ystanbulǵa attanyp, velomarafonyn osynda aıaqtamaq. Ol Ystanbulǵa 55-inshi kúni jetip, barlyǵy 5555 shaqyrymdy eńsermek.
Túrkııa astanasynda qazaqstandyq saıahatshyny jerlesteri ǵana emes, jergilikti turǵyndar da ystyq yqylaspen qarsy aldy. Ankara qalasynyń Kechıoren aýdanynda ornalasqan qazaq oıshyly Abaı Qunanbaev eskertkishi aldynda Qazaqstannyń Túrkııadaǵy Elshiligi men aýdan ákimdigi birlese otyryp, saıahatshynyń kelýine oraı saltanatty shara uıymdastyrdy.
Qostanaılyq veloshabandoz jolda keziktirgen jurtshylyqqa qazaqtyń birtýar aqyny Ahmet Baıtursynulynyń ómiri men shyǵarmashylyǵy jaıly baıandap berdi.
Sonymen birge, ol áleýmettik jelilerde jolda kezdesken adamdardyń ómiri men salty týraly jazbalar qaldyrdy.
Avtory: Akjigit Chýkýbaev