Qostanaılyq polıtseıler jyldy qorytyndylady

QOSTANAI. QazAqparat – Qostanaılyq tártip saqshylary osy jyly atqarǵan jumystaryn qorytyndylady. Ol týraly Qostanaı oblystyq Polıtsııa departamenti bastyǵynyń mindetin atqarýshy, polıtsııa polkovnıgi Qaırat Dúısembekov brıfıng barysynda aıtty, dep habarlaıdy QazAqparat tilshisi.

2021 jyly oblys polıtsııasy ishki ister organdarynyń júıesin reformalaý boıynsha memleket jáne ІІM basshylyǵy qoıǵan mindetterdi oryndaý boıynsha jumys istedi.

«Osy jyldyń 11 aıynyń qorytyndysy boıynsha, qylmys deńgeıi 10 myń turǵynǵa shaqqanda 112-den 101-ge deıin qysqarǵan. Qylmystardyń jalpy sany 11,4%-ǵa tómendedi. Oblysta mundaı úrdis 6 jyldan astam ýaqyt boıy saqtalyp keledi, - dedi Q.Dúısembekov.

— Ótken jylmen salystyrǵanda qoǵamdyq oryndar men eldi meken kósheleri qaýipsiz bola tústi dep aıtýǵa negiz bar. Adam óltirý, densaýlyqqa aýyr zııan keltirý, buzaqylyq, tonaý, qaraqshylyq jaǵdaılary azaıǵan».

Vedomstvoda qylmystyń tómendeýin asa qaýipti jasyryn qylmystardy anyqtaý boıynsha jasalǵan belsendi jumyspen baılanystyryp otyr.

«Eń aldymen, esirtki qylmysyn atap óteıin. Bıyl biz jeke satýshylardan basqa, jalpy sany 18 adamnan turatyn 2 uıymdasqan qylmystyq topty zalalsyzdandyrdyq. Eki top Qazaqstannyń ońtústik óńirlerinen esirtkini kóterme jetkizýmen jáne ótkizýmen aınalysyp kelgen, - dedi Q.Dúısembekov.

- Jalpy alǵanda, olardyń qara naryqtaǵy quny shamamen 600 mıllıon teńgeni quraıdy».

Qaırat Dúısembekovtiń aıtýynsha, álemdik aýqymdaǵy taǵy bir problema – ınternet-tehnologııa salasyndaǵy qylmys bolyp otyr.

«Ásirese, alaıaqtyq. Qylmystyń osy túri eseptik kezeńde aıtarlyqtaı ósken. Osy qylmys jasaý kezinde qoldanylatyn abonenttik nómirlerge júrgizilgen taldaý kórsetkendeı, olardyń basym bóligi bizdiń óńirden tys jasalýda: shet memleketterde, respýblıkanyń basqa oblystarynda. Bul qylmysty áshkereleýdi qıyndatyp otyr. Soǵan qaramastan, jyl basynan beri 72 ınternet-alaıaǵy anyqtaldy. Olar 264 qylmys jasaǵan», - dep atap ótti ol.