Qostanaılyq polıtseıler WhatsApp jelisinen top ashty

QOSTANAI. QazAqparat - Qostanaıda polıtseıler men páter ıeleri kooperatıvteriniń (PIK) tóraǵalary aýmaqtardaǵy qoǵamdyq tártipti saqtaý jáne órt qaýipsizdigi jaǵdaıy boıynsha aqparat almasý úshin Vatsap messendjerinen top ashty, dep habarlaıdy QazAqparat.

Mundaı sheshim Qostanaı, Rýdnyı jáne Lısakov qalalarynyń PIK tóraǵalarymen birlesken keńeste qabyldandy. Kezdesýde Qostanaı oblysy polıtsııa departamentiniń bastyǵy Beket Aımaǵambetov, quqyq buzýshylyqtyń aldyn alý jáne polıtsııa jumysynyń sapasyn arttyrý úshin azamattyq qoǵamnyń pikiri mańyzdy ekendigin aıtty. General jıynǵa qatysýshylarǵa «Spaıs» jáne «Jyldamdyq» sııaqty esirtki preparattarynyń jarnamasyn jabý úshin turǵyndardyń kómegi qajet ekenin atap ótti.

Jergilikti polıtsııa qyzmeti basqarmasynyń bastyǵy Qurmet Májikenov óz sózinde aǵymdaǵy jyly qylmystyń jalpy tirkelýi shamamen segiz paıyzǵa tómendegenin jetkizdi.

«Bógdeniń múlkin urlaý faktileri 15%-ǵa qysqardy.Osy ýaqytqa deıin polıtsııa qyzmetkerleri 43 myńnan astam ákimshilik zańnamanyń buzylýyn anyqtady.Búginde «Qazaqtelekom» AQ mamandarymen birigip, aýlalarǵa 1000-nan astam beınekamera ornatyldy. «Qaýipsiz aýla» baǵdarlamasy boıynsha 60 aýla ishinde qosymsha kameralar jumys isteıdi. Bul qylmystyń aldyn alýda úlken ról atqarady», - deıdi Q.Májikenov.

Jazda, ásirese túngi ýaqytta kóshede jastar mototsıkldermen jarysqa túsip, qoǵamdyq tynyshtyqty buzady. Bul máseleni «Ortalyq» PIK tóraǵasy Almat Aıdosov kóterdi. Al polıtsııa bastyǵy tártip buzýshylar jaýapqa tartylatynyn aıtty.

«Stroıtel G» PIK tóraǵasy Elena Kozına Karbyshev kóshesinde jaıaý júrginshiler ótkeline knopka ornatý qajet ekenin atap ótti, sebebi bul jol ýchaskesinde jol-kólik apaty jıi tirkeledi.

Jıyn sońynda taraptar turǵyndarmen WhatsApp arqyly baılanys ornatýǵa ýaǵdalasty. Messendjerdegi topqa polıtsııa jáne PIK basshylary, turǵyndar qosylatyn bolady.