Qostanaılyq polıtseıler óńirge esirtki jetkizý arnasynyń jolyn kesti

QOSTANAI. QazAqparat - Arnaıy operatsııa barysynda polıtseıler zańsyz aınalymnan 1,5 keliden astam «sıntetıkany» tárkiledi, dep habarlaıdy QazAqparat ІІM-ne silteme jasap.

Jedel-izdestirý is-sharalarynyń barysynda Qostanaı oblysy PD esirtki qylmysyna qarsy is-qımyl basqarmasynyń qyzmetkerleri óńir aýmaǵynda jasyryn «qoıyp ketý» jolymen sıntetıkalyq esirtki quraldaryn ótkizýdi júzege asyratyn ınternet-dúkenniń múshelerin anyqtady.

Tintý is-sharalaryn júrgizý kezinde polıtseıler sıntetıkalyq esirtkilerden basqa, ustalǵandardyń turǵylyqty jeri boıynsha zańsyz ósirilgen quramynda esirtki bar ósimdikterdi tárkiledi.

«Kúdiktiler aımaq aýmaǵyna «qoıyp ketý» arqyly 1,5 keli «sıntetıka» taratýdy kózdegen. Qostanaı oblysynyń 27 jáne 29 jastaǵy eki turǵyny múshe bolǵan ınternet-dúken óńir aýmaǵynda 4 aıǵa jýyq jumys istegen», - dedi Qostanaı oblysy PD bastyǵynyń orynbasary Dúısembaı Baıbosynov.

Polıtseıler 297-baptyń 3-bóligi boıynsha sotqa deıingi tergep-tekserýdi bastady.

Qajetti tergeý áreketteri júrgizilip jatyr.