Qostanaılyq polıtseıler ınternet-alaıaqtardan saq bolýǵa shaqyrady

QOSTANAI. QazAqparat - Qostanaıda ınternet alaıaqtyǵy faktileri kóbeıgen. Bul týraly polıtsııa departamentinde ótken brıfıng barysynda málim etildi, dep habarlaıdy QazAqparat.

Quqyq qorǵaýshylardyń aıtýynsha, qylmystardyń deni áleýmettik jeli men túrli jarnamalyq saıttar arqyly satylatyn taýarlar men qyzmet túrlerine qatysty.

«19 jastaǵy qala turǵyny «Instagram» jelisi arqyly 11 000 teńge kólemindegi sport kıimine tapsyrys bergen. Alaıda, sol kúıi ózine tıesili taýarǵa qol jetkizbegen. Jábirlenýshiniń onlaın-nesıe júıesi arqyly tólem jasaǵany málim boldy. Bıyl osyǵan uqsas 49 ınternet-alaıaqtyq qylmysy tirkelgen», - deıdi polıtsııanyń baspasóz qyzmetindegiler.

Sonymen qatar, óńirde «Páter» profılaktıkalyq sharasy barysynda 12 páter urlyǵynyń beti ashyldy.

Atalǵan faktiler boıynsha QR QK 188-babyna sáıkes sotqa deıingi tergeý sharalary júrgizilip jatyr.

Polıtseıler ınternet-alaıaqtardan saq bolýǵa shaqyrady. Sebebi, kúnnen kúnge jańa tehnologııalar arqyly ǵalamtordyń kómegimen saýda jasaıtyndar sany artyp keledi. Biraq, adamdar aldanyp qalǵanyn bilmeı qalady. Sondaı-aq, óziniń jeke basyna qatysty málimetterdi taratpaýǵa, kúdikti degen saıttarǵa jibermeý jáne onlaın saýda jasaý barysynda barynsha uqypty bolýdy eskertedi.