Qostanaılyq polıtseıler ıesiz saıajaıdy panalaǵan ana men balaǵa kómektesti
16:06, 02 Mamyr 2019
QOSTANAI. QazAqparat - Qostanaı aýdandyq polıtsııa qyzmetkerleri qıyn jaǵdaıǵa tap bolǵan jańa týǵan náresteli áıelge kómek kórsetti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Tártip saqshylary «Avtomobılıst» qoǵamdyq saıajaıyn barlaý barysynda buzylǵan úıden úsh aılyq sábıi bar áıeldi baıqap qalǵan.
«Munda 35 jastaǵy Vıta Kırılıýk joldasymen birge turyp jatqany belgili boldy. Olardyń páter jaldaýǵa aqshasy joq. Sol sebepti buzylǵan saıajaı úılerinde turyp kelgen. Bir qıyny, otbasynyń jasqa tolmaǵan balasy bar», - dedi departamenttiń resmı ókili Sáýle Nurpeıisova.
Kámeletke tolmaǵandar isi jónindegi polıtsııa qyzmetkeri Álııa Shektibaeva Kırılıýkter otbasyn polıtsııa bólimshesine jetkizip, tamaqtandyrdy. Sondaı-aq, alǵashqy qajetti tazalyq zattary men balaǵa jórgek satyp alyp berdi. Keıin ana men sábı «Analar men balalar úıine» jetkizildi.