Qostanaılyq polıtseıler fermerlerdi bopsalaýmen aınalysqan - antıkor

QOSTANAI. QazAqparat – Qostanaı oblysy Denısov aýdanynyń polıtseıleri aýyl sharýashylyǵy taýaryn óndirýshilerdi bopsalaýmen aınlysqan. Bul týraly Sybaılas jemqorlyqqa qarsy is-qımyl agenttiginiń óńirlik departamentinen málim etti, dep habarlaıdy QazAqparat tilshisi.

«Departament aýyl sharýashylyǵy baǵyty boıynsha birqatar sharalar qabyldady. Denısov aýdanynyń polıtseıleri tarapynan aýyl sharýashylyǵy taýaryn óndirýshilerden bopsalaý faktileri anyqtaldy. Osyndaı faktilerge jol bermeý maqsatynda polıtsııa departamentiniń basshylyǵy oblystyń 5 aýdanynyń basshylyq quramyn jańartty. Osylaısha, egin jınaý kezeńinde aýyl sharýashylyǵy tehnıkasyn tekserýge jáne negizsiz toqtatýǵa tyıym salyndy», - delingen departamenttiń baspasóz habarlamasynda.

Quzyrly organ málimetinshe, 9 aıdyń ishinde oblysta jeńildetilgen qantqa qatysty da zańsyz áreketter anyqtalǵan.

«Jeńildetilgen qantpen jasalǵan zańsyz áreketter toqtatylady. Osylaısha, turaqtandyrý qoryna 3 tonna qant qaıtaryldy. Onyń ústine Qostanaı qalasy ákiminiń orynbasary, «Tobyl» áleýmettik-kásipkerlik korporatsııasy basqarma tóraǵasynyń orynbasary, Qamysty aýdanynyń ákimi jazalandy. Munymen qosa, «Tobyl» ÁKK menedjeri men qoıma meńgerýshisi jáne Qostanaı qalasy ákimdiginiń kásipkerlik bóliminiń basshysy qyzmetterinen bosatyldy», - dep málim etti jergilikti departamenttiń baspasóz qyzmetinen.

Sondaı-aq, salynyp jatqan joldardy tekserý kezinde sybaılas jemqorlyqqa qarsy qyzmet ákimdikterdiń sapasyz jol ýchaskelerin qabyldaýyna jol bermeý jolymen 169,5 mln teńge somasyna zalaldyń aldyn alǵan.

Budan ózge, sapasyz ári ýaqytyly oryndalmaǵan aýyz sý tartý jumystaryna qatysty da tekseris júrgizilgen.

Nátıjesinde jekelegen sýmen jabdyqtaý obektilerinde jumys qaıta bastalyp, negizsiz tólengen 26 mln teńge qaıtarylǵan.

Jalpy, bıylǵy 9 aıda oblystyq departamenttiń is júrgizýinde 182 qylmystyq is tirkelgen. Onyń 52-si sotqa joldanǵan.