Qostanaılyq polıtseıler boranda adasyp ketken balyqshylardy qutqardy

QOSTANAI. QazAqparat – Soltústik Qazaqstan oblysynyń turǵyndary Sarykól aýdanynyń polıtseılerine qutqarǵany úshin alǵys bildirdi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

«2021 jyldyń 28 qańtarynda túngi saǵat 3 shamasynda Sarykól aýdandyq polıtsııa bóliminiń kezekshi bólimine er adam habarlasyp, kómek surady. 24 jastaǵy jigit 27 qańtar kúni dosymen birge Sarykól kóline balyq aýlaýǵa kelgen. Sol kúni keshke aýa raıy nasharlaı bastady. Boran túsip, balyqshylar úıge jınala bastaǵanda kóligi buzylyp qalady. Balyqshylar kólden shyǵatyn joldy taba almaǵan. Polıtsııa bóliminiń kezekshi kapıtany Jaslan Sultanov jedel túrde júk kóligin taýyp, izdeý jumystaryn uıymdastyrady», - deıdi polıtsııanyń baspasóz qyzmetindegiler.

Polıtseıler Serik Tóleshov pen Janat Esmaǵambetov «GAZ 66» avtokóligin minip, balyqshylardy izdeýge shyǵady. Birer saǵattan soń olar kól ústinde turǵan «VAZ 21214» avtokóligin kóredi. Kólik ishinde betin aıaz qaryǵan balyqshylar kútip otyrdy. Polıtseıler synǵan kólikti tirkep, aýdan ortalyǵyna alyp keldi. Tońyp qalǵan soltústikqazaqstandyqtar polıtsııa bóliminde boı jylytty.

«SQO turǵyndary Dmıtrıı Shtyh pen Andreı Flıtse aman saqtap qalǵan tártip saqshylaryna alǵys aıtyp, úılerine aman-esen jetti», delingen polıtsııa habarlamasynda.