Qostanaılyq polıtseıler balkonnan sekirip ketpek bolǵan qyzdy qutqaryp qaldy

QOSTANAI.QazAqparat – Qostanaı oblysy polıtsııa departamentiniń qyzmetkerleri Murat Álmaǵambet pen Nurdáýlet Júsip sýıtsıd jasamaq bolǵan qyzdy aman alyp qaldy, dep habarlaıdy QazAqparat.

Vedomstvonyń baspasóz qyzmeti taratqan aqparatqa súıensek, tártip saqshylary ákimshilik aýmaqta reıd jasap júrgen.

«Olar úıdiń besinshi qabatyndaǵy balkonda turǵan qyzdy kóredi. Polıtseıler dereý saqtyq sharalaryn qabyldady. Murat Álmaǵambet qyzben sóılesý úshin besinshi qabatqa kóterildi, al Nurdáýlet Júsip syrtta turdy. Páterge kirgen tártip saqshysy balkonnan sekirip ketpek bolǵan qyzdy ustap qaldy. Keıin ol medıtsına qyzmetkerlerin shaqyryp, qyzǵa kómek kórsetti», delingen baspasóz habarlamasynda.

Belgili bolǵandaı, 26 jastaǵy qyz otbasylyq daý-damaıdan soń sýıtsıd jasamaq bolǵan. Aıta ketý kerek, «102» atalmysh fakti boıynsha habarlama túspegen.

Adam ómirin saqtap qalǵan polıtsııa kapıtany Murat Álmaǵambetov ishki ister organdarynda 2006 jyldan bastap qyzmet etedi. Polıtsııa leıtenanty Nurdáýlet Júsiptiń eńbek ótili – 5 jyl.