Qostanaılyq polıtseı «Jyl aqyny» syılyǵyna usynylyp, Dostoevskıı medalimen marapattaldy

NUR-SULTAN. QazAqparat – Qostanaılyq saqshy Talǵat Nurǵalıev Reseıdegi «Jyl aqyny» ulttyq ádebı syılyǵynyń nomınanty atanyp, Dostoevskıı medalimen marapattaldy, dep habarlaıdy QazAqparat tilshisi.

Bul týraly Reseı Jazýshylar odaǵynyń prezıdıýmy málim etken.

Qostanaı oblysy Rýdnyı qalasy polıtsııa basqarmasynyń qyzmetkeri, polıtsııa maıory Talǵat Nurǵalıev «Stıhı.rý» saıtyna 60-tan astam óleńin jarııalaǵan.

Keıin oǵan shyǵarmalary «Jyl aqyny» ulttyq ádebı syılyǵyna usynylǵany týraly habar keledi.

Ol kórshi eldegi ádebı syılyqtyń nomınanty atanyp qana qoımaı, konkýrstyń almanaǵyna shyǵarmalaryn bastyrý múmkindigin alyp otyr.

Talǵat Nurǵalıev – Qostanaı oblysy Denısov aýdany Bataly aýylynyń týmasy. Poezııaǵa áýestigi bala kezinen bar.

Óziniń aıtýynsha, úıde ákesi Sabyrtaı Santaıuly balalaryna óleń oqyp beretin bolǵan. Óse kele ádebıetke degen yqylasyn orys tili muǵalimi Valentına Bespalova darytqan.

«Talǵat mektepte ár túrli shyǵarmashylyq baıqaýlarǵa qatysty. Ol ishki ister organdarynda jumys isteı júrse de poezııany qatar alyp júrdi. Qyzmetin 2002 jyldan bastap patrýldik polıtsııa qyzmetkeri bolyp bastaǵan. Qazir Rýdnyı qalasy polıtsııa basqarmasynyń azamattyq jáne qyzmettik qarý aınalymyn baqylaý ınspektory laýazymynda jumys isteıdi», - dep túsindirdi oblystyq polıtsııa departamentiniń ókilderi.

Bir jyl ishinde aqyn saqshy mahabbat, tabıǵat, otbasy jáne jumys týraly birneshe óleńder jınaǵyn jazyp úlgergen.

«Men úshin bul kútpegen jaǵdaı boldy. Óleńderim osyndaı baǵa alady dep kútpegen de edim. Bul marapat shyǵarmashylyǵymnyń jańa kezeńi bolady dep úmittenemin. Óleń arqyly ishtegi sezimderimdi syrtqa shyǵaramyn. Onyń ózinde jumystan qolym bosaǵanda ǵana ýaqyt tabam», - deıdi saqshy.

Polıtsııa maıory poezııadan bólek orden, medalder jınaǵandy unatady. 12 jasynan bastap túrli tósbelgi jınap keledi. Qazir kollektsııasynda myńnan astam ár túrli tósbelgi bar.