Qostanaılyq kólik ınspektsııasy júk tasymaldaý talaptaryn kúsheıtti
Búgin ákimdikte ókten apparat májilisinde oblystyq kóliktik baqylaý ınspektsııasynyń basshysy Joldasbek Arapbaevtyń baıandamasy tyńdaldy. Bas ınspektordyń aıtýynsha, byltyr ákimshilik quqyq buzǵan 1614 jeke jáne zańdy tulǵaǵa 98 603 myń teńge kóleminde aıyppul salynyp, 85656 myń teńge óndirilip alynǵan. Kólik ınspektsııasy 2018 jyly 20 standart boıynsha 2797 memlekettik qyzmet kórsetti
«Inspektsııa kóliktik baqylaýdy «Qarabalyq» statsıonarlyq beketi men 2 jyljymaly beket arqyly júzege asyrady. Byltyr 1455 avtokólik júrgizýshisine 93,022 teńge kóleminde ákimshilik aıyppul salyndy. Bizdiń qyzmetkerler asyra júk tıegeni úshin 301 tulǵany ákimshilik jaýapkershilikke tartyp, 45 mln teńgeden astam aıypul óndirgen. Munyń syrtynda ken oryndaryna tıesili ınertti materıal tasymaldaıtyn kólikter de shamadan asyra júk tıep jolǵa shyǵady. 2018 jyly osyndaı 47 júk jóneltýshige ákimshilik shara qoldanyldy. Júk tasymaldaý tártibin retke keltirý úshin búginde oblys aýmaǵyndaǵy ken oryndaryna kólik salmaǵyn ólsheıtin arnaıy tarazylardyń sanyn kóbeıtý qajettiligi týyndap otyr», - deıdi
Shamadan tys júk artýshylardyń qatarynda reseılik kólikter de jıilep barady. Kólik ınspektsııasy byltyr osyndaı 27 sheteldik júk tasymaldaýshyny ákimshilik jazaǵa tartqan. Kóktemgi qar erý, sý tasý maýsymynda qyrtysy jibigen joldyń buzylýy ońaı. Osyǵan baılanysty 23 naýryz ben 1 mamyr aralyǵynda tıeletin júk salmaǵy bir osti avtokólikter úshin 8 tonnaǵa, al qosarly osti avtokólikter úshin 13,2 tonnaǵa deıin kemıtin bolady.
Júk tasymaldaý talaptaryn baqylaýdy avtomattandyrý jumysy birshama ilgerilep keledi. Búginde Fedorov eldi mekeni men Áýlıekól aýyly mańyndaǵy kúre jol ústinde arnaıy avtomattandyrylǵan tarazy jumys isteıdi. Júk kólikterin avtomatty túrde baqylaıtyn mundaı aqyldy tarazylar jyl sońyna deıin oblys arqyly ótetin halyqaralyq jáne respýblıkalyq mańyzy bar barlyq baǵyttaǵy joldarǵa ornatylmaq.