Qostanaılyq kásipkerler Arysqa gýmanıtarlyq kómek jiberdi
«Nur Otan» partııasy tarapynan qolǵa alynǵan «Arys biz birgemiz» qaıyrymdylyq sharasyna kásipkerler bir kisideı atsalysyp jatyr. Jarylystan zardap shekkenderge járdem berý úshin aımaq kásiporyndary jan-jaqty qoldaý kórsetti. Óńirge belgili «Akva-Arasan» seriktestigi partııa bastamasyn qoldap, qol ushyn berýdi jón sanaǵan.
«20 tonnadan astam aýyz sý tıelgen júk kóligi ońtústik óńir turǵyndaryna jóneltildi. Kóptiń kúshimen jınalǵan balalar men eresekterge arnalǵan kıim-keshek, turmysqa qajetti zattar da Arystaǵy aǵaıynǵa jetkizildi. Kásiporyn basshysy Alekseı Efrımov - «Nur Otan» partııasy atynan qalalyq máslıhattyń depýtaty. Árdaıym qoǵam ómirindegi mańyzdy bastamalarǵa atsalysyp turady. Partııanyń muryndyq bolǵan ıgi aktsııasyna birinshi bolyp ún qatqandardyń biri bizdiń kompanııa. Bul jarylystan zardap shekkenderge kórsetiletin kómektiń sońy emes. Álde de qoldaý kórsetýge ázirmiz»,- deıdi «Akva-Arasan» kásiporny zaýyt basqarýshysy Igor Gennı.
Gýmanıtarlyq kómekti Qostanaıdaǵy kólik tasymaldaý kompanııalarynyń biri tegin jetkizip berdi. Olardyń aıtýynsha, júk kólikteri Arys qalasyna belgilengen ýaqytta jetti.
«Halyqtyń basyna qıyn sát týǵanda járdem berýden biz de qalys qalmaýdy jón kórdik. Aldaǵy ýaqytta da óz tarapymyzdan Arys qalasynyń turǵyndaryna qoldan kelgen kómektiń bárin kórsetemiz», - deıdi SV Trans Logistic basshysy Valerıı Sýsarenko.
Buǵan deıin Qostanaıdan Arys qalasyna 20 tonna un, 7 tonna makaron, 3 tonna kondıter ónimderi jóneltildi. Sońǵy jaǵdaılarǵa baılanysta oblysta gýmanıtarlyq kómek qabyldaý beketi ashyldy.