Qostanaılyq kásipker kópbalaly otbasyǵa úı alyp berdi

QOSTANAI. QazAqparat - Qostanaılyq kásipker «Baqytty otbasy» jobasy aıasynda kópbalaly otbasyǵa úı satyp alyp berdi, dep habarlaıdy QazAqparat «Nur Otan» partııasynyń baspasóz qyzmetine silteme jasap.

Elbasy Nursultan Nazarbaevtyń bastamasymen qolǵa alynǵan «Baqytty otbasy» jobasy kóptegen januıaǵa qýanysh syılap keledi. Osyndaı is - sharalardyń biri Taran aýdanynda jalǵasty. Jergilikti sharýa qojalyǵynyń basshysy Krasnoselskıı aýylynan áleýmettik az qamtylǵan otbasyǵa 4 bólmeli úı alyp berdi. Baspana baqyty Azatskaıalardyń otbasyna buıyrdy.

«Bul kútpegen tosynsyı boldy. Adamgershilik jasap, shańyraǵymyzdy shattyqqa keneltken kásipkerge alǵys bildiremiz. Buǵan deıin basqa aýylda baspana jaldap keldik. Ári balalarǵa mektepke qatynaý qıyn bolatyn. Bizdiń máselemiz beıjaı qaldyrmaǵany qýantady. Mundaı úıge qol jetkizemiz dep eshqashan oılaǵan joqpyz»,- kópbalaly ana Marına Azatskaıa.

Aıta keteıik, bul otbasy osydan birneshe apta buryn turǵyn úı máselesimen partııanyń qoǵamdyq qabyldaýyna kelgen bolatyn.