Qostanaılyq kásipker balalarǵa oıyn alańyn salyp berdi
Búldirshinderge mundaı syılyqty «Qarabatyr» Agrofırmasy» JShS dırektory Marat Qudaıqulov tartý etip otyr. Onyń sózinshe, «Rýhanı jańǵyrý» baǵdarlamalyq maqalasyndaǵy baǵyttardy is júzinde kórsetýdiń mańyzy zor.
«Seriktestigimizdiń negizin qalaǵan ákem Jázıt Kárimuly aýyldiń eńsesin tiktep, sharýashylyqty kóterýmen qatar, eldi meken ishin abattandyrýǵa kóp kúsh saldy. Jastardyń sportpen shuǵyldanýy, óner-mádenıet salalaryna bet burýyna jaǵdaı jasaýmen birge balalarǵa da kóp nazar aýdaratyn. Biz de ol kisiniń salǵan jolyn jalǵastyryp, búgin kishkentaı balǵyndarymyzǵa syı retinde osyndaı oıyn alańyn salyp berdik», — deıdi Marat Qudaıqulov.
Oıyn alańy keńes zamanynda salynǵan daladaǵy basseınniń ornynda boı kóterip otyr. Uzyndyǵy – 35, eni - 18 metrlik aýmaq ishinde zamanaýı syrǵanaqtar, tor arqanmen júrý, órmeleýish, átkenshek, basqa da sergýge arnalǵan oıyn nysandary bar. Alań syrty qorshalyp, astyna jasandy kógal tóselgen. Jalpy quny 7,5 mıllıon teńgeniń qurylys jumystaryn elordalyq «MAF» kompanııasy oryndapty.
Saltanatty sharada sóz alǵan ardagerler keńesiniń tóraǵasy Uzaqbaı Amanbaev, aýyl ákimi Beıbit Mindáýletov mundaı ıgilikti is Elbasynyń «Rýhanı jańǵyrý» maqalasynda alǵa qoıǵan úlken jaýapkershiliktiń biri – jalpyulttyq patrıotızmniń naǵyz ózegine aınalǵan «Týǵan jer» baǵdarlamasyna zor úles qosý deıdi.
Buǵan deıin Qarabatyr aýylynda «Aqbota» balabaqshasy, kóp páterli turǵyn úı, mádenıet saraıy qatarly áleýmettik mańyzy bar nysandar kópshiliktiń ıgiligine berilgenin aıta ketý kerek.