Qostanaılyq 554 dana bes lıtrlik araqty zańsyz satpaq bolǵan

QOSTANAI. QazAqparat - Qostanaı qalasynyń turǵyny 2,77 tonna araq jáne 200 lıtr spırtti zańsyz satpaq bolǵan, dep habarlaıdy QazAqparat Qarjy monıtorıngi komıtetiniń baspasóz qyzmetine silteme jasap.

Komıtettiń Qostanaı oblysy boıynsha Ekonomıkalyq tergeý departamenti qyzmetkerleri alkogol ónimin zańsyz tasymaldaý jáne satý deregin anyqtady.

«Tergeý barysynda Qostanaı qalasynyń turǵyny alkogol ónimin zańsyz satyp alyp, lıtsenzııasyz kásipkerlik qyzmetpen aınalysqandyǵy anyqtaldy. Atalmysh azamat avtokólikterge janarmaı quıý stantsııasy mańynda «Mercedes-Bens Sprinter» avtokóliginde Tobyl qalasynda satyp alǵan bes lıtrlik bótelkelerde 2 770 lıtr kóleminde (554 quty) ishimdik jáne 200 lıtr spırt saqtap, tasymaldaǵan», delingen habarlamda.

Qostanaı qalalyq sotynyń úkimimen oǵan Qylmystyq kodekstiń 214-baby 1-bóligimen qylmystyq quqyq buzýshylyqty jasaǵany úshin kináli dep tanylyp, oǵan 1 000 AEK (2 778 000 teńge) mólsherinde aıyppul salyndy.