Qostanaıǵa 400-den astam otbasy qonys aýdarǵan

QOSTANAI. QazAqparat - Qostanaı qalasynda Nátıjeli jumyspen qamtý jáne jappaı kásipkerlikti damytýdyń 2017-2019 jyldarǵa arnalǵan «Eńbek» baǵdarlamasyn iske asyrý máseleleri talqylandy, dep habarlaıdy QazAqparat.

Keńes jumysyna QR Premer - Mınıstriniń orynbasary Gúlshara Ábdihalyqova men QR Eńbek jáne halyqty áleýmettik qorǵaý mınıstri Berdibek Saparbaev qatysty. Aldymen Qostanaı oblysynyń ákimi Arhımed Muhambetov baıandama jasady. Onyń aıtýynsha, oblysta negizgi makroekonomıkalyq kórsetkishter boıynsha oń dınamıka saqtalýda.

«Ónerkásipte naqty kólem ındeksi - 108,3%, aýyl sharýashylyǵynda - 101,0%, qurylysta - 122,3%, kóterme saýdada -132,2%, bólshek saýdada 105,4%-dy qurady. Jalpy ishki ónim 2018 jyldyń 9 aıynyń qorytyndysy boıynsha 10,3%-ǵa teń. Degenmen, sáýir aıynyń sońyna deıin bul kórsetkishti taǵy 5%-ǵa kóteremiz degen boljam bar. Sebebi, barlyq memlekettik, úkimettik baǵdarlama josparly túrde ıgerilýde», - dedi aımaq basshysy.

«Jumyspen qamtýdyń Jol kartasy 2020» jáne «Eńbek» baǵdarlamalarynyń iske asyrylýy oblystyń eńbek naryǵynda oń serpin baıqatty. 2010 jylmen salystyrǵanda jaldamaly qyzmetkerler sany 37 myń adamǵa artqan. Jumyssyzdyq deńgeıi 5,3%-dan 4,8%-ǵa deıin tómendedi.

Arhımed Muhambetov jappaı qonys aýdarýdyń paıdasyna toqtaldy. Óıtkeni, jyl saıyn jumys berýshilerdiń 2 myńǵa jýyq bos orny tolmaı qalady.

«Úkimet osy problemalardy joıý maqsatynda Qostanaı oblysyn eńbek resýrstarynyń aýmaqtyq utqyrlyǵyn yntalandyrý sheńberinde oralmandar men qonys aýdarýshylardy qonystandyrý óńiri dep tanydy. Nátıjesinde, jumys kúshi mol óńirlerden 246 otbasy (1135 adam) jáne 185 oralman otbasy (606 adam) óz erkimen Qostanaı oblysyna qonys aýdardy. Olarǵa tıisti kómek kórsetildi», - dedi Arhımed Muhambetov.

Aıta keteıik, buǵan deıin QR Eńbek jáne halyqty áleýmettik qorǵaý mınıstrligi Qazaqstanda azamattyq almaǵan oralmandardyń mártebesin uzartýǵa qatysty túsinikteme bergen edi.