Qostanaıdyń ındýstrııaldyq aımaǵy 1 trln teńgeniń 12 jobasyn júzege asyrmaq

ASTANA. QazAqparat - Qostanaıdyń ındýstrııaldy aımaǵy jalpy somasy 1 trln teńgeden asatyn 12 jobany ornalastyrýdy josparlap otyr. Mundaı derekti Qostanaı oblystyq kásipkerlik jáne ındýstrıaldy-ınnovatsııalyq damý basqarmasy keltiredi, dep habarlaıdy QazAqparat tilshisi.

Vedomstvo málimetinshe, búginde ındýstrııaldy aımaq aýmaǵyna ınfraqurylym tartý jumystary aıaqtalýǵa jaqyn.

«Qazirgi ýaqytta ákimdik «Tobyl» ÁKK» AQ-pen birlesip, 1 trln teńgeden astam somaǵa 12 jobany ornalastyrý máselesin qarastyryp jatyr. Josparlanǵan jobalar mashına jasaý, aýyl sharýashylyǵy, gaz ónerkásibi salalaryna qatysty», - dep atap ótedi basqarmadan.

Atap aıtqanda, atalǵan aımaqta reseılik «Kompozıt Grýpp» holdınginiń jobasy MTZ traktorlarynyń óndirisi ornalastyrylady. Qazirgi ýaqytta qural-jabdyqtardy ornalastyrý jumystary júrgizilip jatyr. 2019 jyly ındýstrııaldy aımaqta astyq jáne maıly daqyldardy tereń óńdeý aýyl sharýashylyǵy habyn salý jumystaryna kiris josparlanǵan.

Josparlanyp otyrǵan aýyl sharýashylyǵy haby qazaqstandyq «BioGrain» kásiporny men qytaılyq China Marine Bunker kompanııasynyń birlesken jobasy sanalady. Jobanyń jalpy quny 300 mln AQSh dollaryn quraıdy. Qazirdiń ózinde «BioGrain» kompanııasy qytaılyq Shansı kompanııasymen óndirilgen barlyq ónimdi QHR-ǵa  eksporttaý týraly (off-take kelisimsharty)  memorandýmǵa qol qoıǵan.