Qostanaıdyń bas polıtseıi turǵyndardy jeke suraqtarymen qabyldady

QOSTANAI. QazAqparat – Qostanaı oblysy Polıtsııa departamentiniń bastyǵy Beket Aımaǵambetov kezekti ret turǵyndarmen onlaın kezdesý ótkizdi, dep habarlaıdy QazAqparat oblystyq Polıtsııa departamenti baspasóz qyzmetine silteme jasap.

Jyl basynan beri general 500-den astam azamatty qabyldaǵan. Bul joly turǵyndar jeke múliktiń joǵalýy, múlik quqyǵyna qatysty suraqtardy kóbirek qoıdy.

Onlaın rejıminde ótken qabyldaýda polıtsııanyń bólim basshylary ár turǵynǵa zań turǵysynan keńester berdi.

Sonymen qatar Beket Aımaǵambetov áleýmettik jelidegi paraqshasyna túsken habarlamalarǵa qatysty máselelerdi sheship berdi. Munda qylmystyq isterdi tergeýge qatysty suraqtar da boldy.

«Árbir suraq – adamnyń taǵdyry, sondyqtan olardyń árqaısysy baqylaýǵa alynady. Búginde adamdar ár saladaǵy kemshilikterdi atap kórsetýde. Mysaly, Tatıana Nurmaǵambetova esimdi turǵyn Dzerjınskıı kóshesinde aǵashtardy zańsyz kesý áreketine qatysty tıisti sharalar qabyldaýdy surady», - deıdi PD bastyǵy.

Polıtsııa qyzmetin reformalaýdaǵy negizgi basymdyqtar – «Qadamdyq qol jetimdiliktegi polıtsııa» jáne «Tyńdaýshy memleket» qaǵıdattary.

Departament basshysy jyldan jylǵa azamattardyń qaýipsizdigi men jol qozǵalysyna qatysty usynystar sany da ósip kele jatqanyn atap ótti.

Osy sharalardyń barlyǵy polıtsııanyń halyqpen qarym-qatynasynyń jańa sıpatyn qalyptastyrady.