Qostanaıdyń atty polıtsııasy balalar úıine tosynsyı jasady

QOSTANAI. QazAqparat - Oblystyq polıtsııa departamentiniń atty polıtsııasy, kınologtar, sondaı-aq arnaıy jasaq jaýyngerleri Rýdnyı qalasyndaǵy balalar úıiniń tárbıelenýshilerin Naýryz meıramymen quttyqtady, dep habarlaıdy QazAqparat.

Rasymen de, atty áskerdiń kelýi balalar úıiniń tárbıelenýshilerine kútpegen syı boldy.

«Naýryz meıramy qarsańynda polıtsııa departamentiniń qyzmetkerleri balalarǵa úlken mereke jasady. Atty polıtsııa men jedel áreket etý arnaıy jasaǵynyń jaýyngerleri balalarǵa ózderiniń ónerin kórsetti. Ásirese, esirtki jáne jarylǵysh zattardy anyqtaýda qoldanylatyn daǵdylardy kórsetken ıisshil ıtterdiń qımyldary erekshe nazar aýdartty», - deıdi Qostanaı oblysy polıtsııa departamenti Kadr saıasaty basqarmasy bastyǵynyń orynbasary Qýanysh Dúısebaev.

Rýdnyı balalar úıiniń qabyrǵasynda jaqynda ǵana jumys isteı bastaǵan «Búrkit» patrıottyq tobynyń tárbıelenýshileri qarýdy bólshekteý jáne jınaý, sondaı-aq saptyq daıyndyqta júrý sheberlikterin kórsetti.

Kezdesý sońynda polıtseıler balalarǵa syılyqtar berip, olarǵa taǵy da qonaqqa kelýge ýáde etti.