Qostanaıdan Qytaıǵa un eksporttalady
Shilde ortasynda Beıjińde «Bir beldeý - bir jol» baǵdarlamasy aıasynda ótken otandyq óndirýshiler jármeńkesinde qostanaılyqtar jergilikti shyǵarylǵan taýardy tanystyrýǵa jáne iskerlik áriptester tabýǵa múmkindik aldy. Qazaqstandyq taraptan iskerlik mıssııany uıymdastyrýshy «Atameken» ulttyq kásipkerler palatasy boldy.
Jármeńkege barlyǵy 13 otandyq óndirýshi, Qostanaı oblysynan «Qaztorgtrans» un tartý kásiporny qatysty. Jármeńkede qostanaılyq ónimge birden qytaılyq úsh kásiporyn qyzyǵýshylyq tanytty.
«Biz damý ústindemiz jáne tıisinshe jańa saýda naryǵyn izdeýdemiz. Qytaı baǵytyna jol kóktemde «Atamekenniń» qoldaýymen ashylǵan. Al jármeńkede ózimizdi tolyqqandy kórsete aldyq. Qytaıda undy belgili bir kvota alǵan kompanııalar ǵana shyǵara alady. Qalǵandarynan alynatyn salyq mólsheri joǵary. Bul jerde bizdiń múddemiz sáıkes keldi. Ónimimizdi eksporttaý nıeti týraly memorandýmǵa qol qoıdyq», - dedi «Qaztorgtrans» JShS menedjeri Veronıka Derevıanko.
Tamyzda qostanaılyqtar kelisim jasaǵan qytaılyq fırmalar yntymaqtastyqty talqylaý úshin oblysqa keledi. Osylaısha, unnyń birinshi partııasy bıil jóneltiledi. «Buǵan deıin biz Ózbekstanǵa, Túrikmenstanǵa, Aýǵanstanǵa eksporttadyq», - dedi kásipkerler