Qostanaıdaǵy Tartyl Fest festıvaline qyzdar da qatysyp jatyr

QOSTANAI. QazAqparat – Qostanaıda ótip jatqan Tartyl Fest respýblıkalyq týrnıkke tartylý festıvaline 276 adam tirkelgen. Olardyń arasynda ákeli-balaly qatysýshylar da bar, dep habarlaıdy QazAqparat tilshisi.

Festıval qalanyń ortalyǵynda ótip jatyr. Týrnıkke tartylýdan baby men baǵyn synap kórgisi kelgen qostanaılyqtar az emes. Qatysýshylardyń eń kishisi – 8 jasta, eń úlkeni – 66 jasta.

Segiz jasar Mansur ákesine erip kelipti. Festıvalge ekeýi de qatysýǵa bel býǵan.

«Men 8 ret tartyldym. Qıyn bolǵan joq. Ákemmen keldim. Birge qatysamyz», - deıdi Mansur.

Festıvalge birge qatysý ákesiniń bastamasy bolǵan. Alaıda, ol uly kelise ketedi dep oılamaǵanyn aıtady.

«Biz salaýatty ómir saltyn ustanamyz. Kúshimizdi synaýǵa keldik. Ulym úıde únemi týrnıkke tartylady. Sonymen birge, djıýdjıtsýge qatysady. Segiz jasynda 8 ret tartyldy. Úılesip tur», - deıdi Almat Ǵappasov.

Týrnıkke tartylýǵa jigitter jaǵy ǵana emes, qyzdar da keldi. Ortaǵa 8 jasar Valerııa Svıstova shyqqanda jınalǵandar dý qol shapalaqpen qoldaý bildirdi. Ol 10 ret tartyldy.

Eske salsaq, qostanaılyq Andreı Antonıan týrnıkke 45 ret tartylyp, festıvaldiń buǵan deıingi qatysýshylary ornatqan rekordty jańartty.

Festıval Qostanaı oblysynda qaıtys bolǵan bes jasar Mádına Erlanqyzyn bir mınýt únsizdikpen eske alýdan bastalǵan bolatyn.