Qostanaıdaǵy órtten joıylǵan orman alqabyna qaıyń egile bastady

QOSTANAI. QazAqparat – Qostanaı oblysynyń Áýlıekól aýdanynda bolǵan alapat órtten ormanǵa kelgen zardaptyń saldaryn joıý úshin aǵash otyrǵyzý jumystary bastaldy. Mundaı habarlama óńirlik ákimdiktiń resmı saıtynda jarııalandy, dep habarlaıdy QazAqparat tilshisi.

«Búgingi kúni qalpyna keltirý jumystary bastaldy. Bıylǵy jyly Áýlıekól - Qostanaı tas jolynyń boıyna aǵash otyrǵyzý josparlanyp otyr. Aǵashtardy bólý jáne otyrǵyzý jumystaryna 100-ge jýyq adam jumyldyrylǵan. Orman sharýashylyǵy jumystaryna 7 brıgada (63 adam, 21 tehnıka) tartyldy. Osy aptada qaıyń egý josparlansa, kelesi aptada qaraǵaı otyrǵyzý bastalady. Sonymen qatar, orman kúzeti qyzmetkerlerine 700-den astam kıim-keshek satyp alyndy», - delingen ákimdik saıtynda.

Jergilikti quzyrly organ dereginshe, bıyl 1 qarashadan bastap oblystyń orman sharýashylyǵy qyzmetkerleriniń jalaqysy kóteriledi.

Eske salaıyq, qyrkúıek aıynda Qostanaı oblysyna qarasty Áýlıekól aýdanynda orman órtengen edi. Birneshe kúnge jalǵasqan órt saldarynan 2 091 adam evakýatsııalanyp, 12 turǵyn túrli jaraqat aldy. Sonymen qatar, Amanqaraǵaı aýylynda 98 úı órtenip ketti. Qazirgi tańda tilsiz jaý saldarynan baspanasynan aıyrylǵandarǵa úı salynyp jatyr. Onyń qurylysy aıaqtalýǵa jaqyn.