Qostanaıdaǵy órt: Zardap shekkenderge qandaı kómek kórsetilip jatyr
Osy oraıda, QazAqparat tilshisi qıyn sátte qostanaılyqtarǵa qol úshin sozǵan kásiporyndar men uıymdar týraly sholý usynady.
Alǵashqylardyń biri bolyp kómek kórsetýge nıet bildirgen – «Halyk Bank».
Ekinshi deńgeıli bank Qostanaı oblysyndaǵy órtten úıleri janyp ketken otbasylarǵa 1 mln teńgeden beredi jáne nesıelerin jabatynyn málimdedi.
«Qostanaı oblysynda úıleri órtenip ketken ár otbasyna 1 mln teńge kóleminde qarjylaı kómek jiberiledi. Úıinen aırylǵan adamdar kúsh jınap, alǵan qarajatyn eń qajetine – turǵyn úıdi jaldaýǵa, kıim-keshek, tamaq jáne qajetti taýarlar satyp alýǵa jumsaıdy.
Sonymen qatar, bank basshylyǵy úı janyp ketken barlyq turǵyndarǵa kredıtterin jabý týraly sheshim qabyldady», - delingen atalǵan bank taratqan habarlamada.
Sonymen qatar, «Qazaqstan halqyna» qoǵamdyq qory alapat órtten zardap shekkenderge kómek kórsetedi.
«Apat saldary joıylyp, zalal kólemi anyqtalǵannan keıin «Qazaqstan halqyna» qory jergilikti atqarýshy organdarmen birlese otyryp óńir turǵyndaryna qaıyrymdylyq kómek kórsetý tetigin pysyqtaıdy. Qor bolǵan jaǵdaıdy qadaǵalap, zardap shekkenderge qoldaý maqsatynda barlyq qajetti sharany qabyldaıdy», - dep málim etti qoǵamdyq qordyń baspasóz qyzmeti.
Parlament Senatynyń depýtattary da qoldaý sharalarynan shet qalmady. Depýtattar kómek retinde bir kúndik jalaqylaryn aýdaratyn boldy.
«Qostanaı oblysynan saılanǵan senatorlar jedel shtabtyń jumysyna atsalysyp jatyr. Sondaı-aq, Senat depýtattary zardap shekkenderge kómek retinde bir kúndik jalaqylaryn aýdarady. Osyndaı jaǵdaıda birligimizdi tanytyp, judyryqtaı jumylý asa mańyzdy. Zardap shekkenderdiń saýyǵyp ketýlerin jáne jaǵdaıdyń tezirek turaqtalýyn tileımiz», - dep jazdy QR Parlamenti Senatynyń spıkeri Máýlen Áshimbaev áleýmettik jelidegi paraqshasynda.
Sondaı-aq, «AMANAT» partııasynyń gýmanıtarlyq kómek qabyldaý pýnktileri ashylyp, kerek-jaraqtardy jınaý jumysyn bastady.
Pýnktiler birinshi kezekte qajetti taýarlar, azyq-túlik, jyly kıim jáne tazalyq quraldaryn qabyldaıdy. Qazirgi tańda «AMANAT» partııasynyń músheleri 312 tonna gýmanıtarlyq kómek jınady.
«Qostanaı oblysynda bolyp jatqan tabıǵı apat barshamyzdy alańdatyp otyr. Jaǵdaı Memleket basshysynyń jeke baqylaýynda. Búgin partııa músheleri men «Jastar Rýhy» qatarynan volonterler jasaqtalyp, apattan zardap shekken turǵyndarǵa barynsha kómek kórsetetin bolady. Budan bólek «AMANAT» partııasynyń óńirlerdegi fılıaldarynda gýmanıtarlyq kómek qabyldaý pýnktteri ashylady», - dep jazdy «AMANAT» partııasynyń tóraǵasy Erlan Qoshanov óziniń Facebook-tegi resmı paraqshasynda.
Qazaqstan halqy Assambleıasy da tilsiz jaýdyń zardabyn tartqan qostanaılyqtarǵa gýmanıtarlyq kómek jınaı bastady.
«Qostanaı oblysy Áýlıekól aýdanynda bolǵan tabıǵı órt apatyna baılanysty Qazaqstan halqy Assambleıasy órt saldarynan zardap shekken halyqqa kómek kórsetý aktsııasyn uıymdastyra bastaǵany týraly habarlaıdy. 4 qyrkúıek kúni Nur-Sultan, Almaty, Shymkent qalalarynyń jáne barlyq oblystardyń Dostyq úılerindegi volonterlik ortalyqtardyń bazasynda qarajat pen qajetti zattardy jınaý úshin jedel shtabtar quryldy», - dep jazady uıymnyń resmı saıty.
Al «Qazaq Oil» janarmaı quıý stantsııasy ulttyq jelisi órt sóndirýge arnalǵan tehnıkalar men barlyq kommýnaldyq qyzmetterge dızeldik otyndy tegin bermek.
«Qazaq Oil JQS ulttyq jelisiniń ujymy apat saldaryn joıýǵa moraldyq qoldaý kórsetýmen qatar, 50 mln teńge kólemindegi materıaldyq kómek bóldi. Sondaı-aq órt sóndirýge qatysatyn arnaıy tehnıkalar men barlyq kommýnaldyq qyzmetterge dızeldik otyn tegin beriledi», - dep jazylǵan kompanııanyń Іnstagram paraqshasyndaǵy habarlamada.
Budan ózge, «Kostanay Music Fest» mýzyka festıvalin uıymdastyrýshylar órtten zardap shekkenderge 50 mln teńge aýdarady.
«Biz bul kontsertke 3 aı boıy daıyndaldyq jáne áýel basta odan túsken aqshany tolyǵymen qaıyrymdylyqqa baǵyttaımyz dep josparlaǵanbyz. Sondyqtan, órtten zardap shekkenderge festıvalden túsken barlyq qarajatty aýdaramyz, ıaǵnı 50 mıllıon teńge osy tabıǵı apattan qıyn jaǵdaıǵa tap bolǵan adamdarǵa kómek retinde beriledi», - dep jazdy festıval uıymdastyrýshysy Almas Jálı óziniń Instagram paraqshasynda.
Atalǵan járdem sharalarymen qatar, elimizdiń ár aımaǵynan gýmanıtarlyq kómek jınaý pýnktileri ashyldy. Atap aıtsaq, Mańǵystaý, Batys Qazaqstan, Túrkistan oblystary men Almaty qalasyndaǵy pýnktiler qarajat, azyq-túlik, kıim-keshek jınaý jumystaryn júrgizip jatyr.
Eske salaıyq, Qostanaı óńirinde órtten zardap shekken turǵyndarǵa kómek berýge arnalǵan biryńǵaı qoǵamdyq qor quryldy.
Qazaqstandyqtar jappaı kómek kórsete alýy úshin qurylǵan qor málimetteri mynadaı:
«Qaıyrymdylyq KZ» QQ
BIN 220640046689
IIK KZ82601 A22100 1568 401
«Qazaqstannyń halyq banki» AQ BIK HSBKKZKX
Kbe 18
Zardap shekkenderge kómek berýdi jeleý etip, qarajat jınaýda alaıaqtyq áreketterdi boldyrmaý úshin jergilikti ákimdik osy kórsetilgen rekvızıtterge ǵana aýdarymdar jasaýdy suraıdy.