Qostanaıdaǵy órt 43 myń gektardan astam aýmaqty sharpyǵan
11:43, 04 Qyrkúıek 2022
NUR-SULTAN. QazAqparat – QR Tótenshe jaǵdaı mınıstri ıÝrıı Ilınniń málimeti boıynsha, Qostanaı oblysy Áýlıekól aýdanyndaǵy órt 43 myń gektardan astam aýmaqty sharpyǵan, dep habarlaıdy QazAqparat tilshisi.
«Qazirgi ahýal mynadaı. Bul oman sharýashylyǵyna qarasty 106 myń gektar orman qorynyń ishinde órt shalǵan aýmaqtyń jalpy aýdany 43 myń gektardan asady. 8 jerde órt laýlap tur. Bul ýchaskelerde jalyn aǵash basyn shalýy múmkin degen qaýip bar. Jalynnyń eldi mekenderdegi turǵyn ǵımarattarǵa taralýyn boldyrmaý úshin úsh jaýyngerlik ýchaske quryldy,- deıdi vedomstvo basshysy.
Órt ormandy alqapta laýlap turǵandyqtan áýeden sý quıý úshin qosymsha tikushaqtar jumyldyrylmaqshy.
«Órttiń taralý baǵytynda úsh áýe kemesi jumys istep jatyr. Qosymsha taǵy úsh áýe kemesi qosylady dep otyrmyz. Olar da áýeden sý tógetin qondyrǵymen jabdyqtalǵan. Aǵash basyn shalǵan órtke osyndaı tásil kóbirek tıimdi bolyp tur», - dedi mınıstr.